İran prezidenti Məsud Pezeşkian ölkəsinin İsraillə imzaladığı atəşkəslə bağlı bildirib ki, Təl-Əviv atəşkəsə əməl etsə, Tehran da buna əməl edəcək.
Elchi.az xəbər verir ki, İranın rəsmi xəbər agentliyi İRNA-nın məlumatına görə, Pezeşkian Malayziyanın baş naziri Ənvər İbrahim və Oman Sultanı Heysəm bin Tariq bin Taymur Əl Səidlə ayrı-ayrılıqda telefon danışığı aparıb.
Pezeşkian Malayziyanın baş naziri İbrahimlə görüşündə deyib: “Əgər sionist rejim atəşkəsi pozmasa, İran da etməyəcək. Biz danışıqlar masası arxasında İran xalqının qanuni hüquqlarını müdafiə etməyə və bu hüquqların arxasınca getməyə hazırıq”.
İbrahim çıxışında İsrailin nüvə silahlarının yayılmaması sisteminə münasibətini tənqid edərək, İsrailin bütün nüvə imkanlarına malik olduğu halda digər ölkələrin qanuni hüquqlarından məhrum etmək istəməsinin qəbuledilməz olduğunu bildirib.
“Biz dinc region qura bilərik”
İran prezidenti Pezeşkian Oman Sultanı Bin Tariq ilə görüşündə deyib: “Birgə əməkdaşlıq etməklə, müharibə və münaqişədən uzaq, tərəqqi, sülh və əmin-amanlıq dolu bir bölgə qura bilərik”.
Pezeşkian deyib ki, ABŞ-ın İsrailin hərbi hücumuna birbaşa müdaxiləsi İranı cavab tədbirləri görməyə məcbur edib.
Omanın Sultanı Bin Tariq İranın Qətərə hücum etmək niyyətinin olmadığının fərqində olduqlarını bildirərək, “Oman və bölgədəki digər qardaş ölkələr İran xalqının hüquqlarını müdafiə etmək səylərinizi dəstəkləyir” ,- deyib.
Nuranə Məmmədova
