Rusiya sülhməramlılarının Qarabağda yerləşdirilməsi yalnız Azərbaycanın deyil, ABŞ-ın da maraqlarına cavab vermir.
“Atlas” Araşdırmalar Mərkəzinin rəhbəri, politoloq Elxan Şahinoğlu Pentaqon-Azərbaycan münasibətlərini şərh edib.
ABŞ müdafiə katibinin Rusiya, Ukrayna və Avrasiya üzrə köməkçisinin müavini, xanım Evelin Farkas sentyabrın 18-də Azərbaycana səfər etdiyimni xatırladan politoloq deyib ki, Azərbaycan rəsmiləri Pentaqon təmsilçiləri ilə görüşlərə daha çox maraq göstərirlər: “Dövlət Departamentinin nümayəndələrindən fərqli olaraq Pentaqon təmsilçiləri insan haqları və demokratiyadan danışmırlar. Rəsmi Bakı bu mövzuları Azərbaycanın daxili işi hesab edir. Bu mənada Evelin Farkas Azərbaycanla münasibətlərin strateji əhəmiyyət daşıdığını bildirdi.
Pentaqon rəsmi Bakı ilə bir neçə mövzuda əməkdaşlığını davam etdirir: Əfqanıstana texniki dəstək, beynəlxalq terrorizmə qarşı mübarizə və boru xətlərinin təhlükəsizliyi. Rəsmi Bakı bu 3 mövzuda Pentaqonla əməkdaşlığın davam etdirilməsində maraqlıdır”.
Politoloqun fikrncə, Kremlin son zamanlar Cənubi Qafqaz istiqamətində fəallaşması, intensivləşən Moskva-Bakı təmasları da Pentaqonu narahat edir. “Evelin Farkasın Bakıya səfəri Rusiyanın Dağlıq Qarabağ münaqişəsinin həllində rolunun artması xəbərlərinin yayıldığı dövrə təsadüf etdi. Farkas ondan əvvəl Bakıya gələn Rusiyanın xarici işlər naziri Sergey Lavrovun səfərinin mahiyyəti ilə maraqlanmamış deyildi.
Evelin Farkas Bakıda keçirdiyi mətbuat konfransında jurnalistlərin Rusiyanın Qarabağ münaqişəsinin həllində artan fəallığı ilə bağlı suala belə cavab verdi ki, Rusiya ATƏT-in Minsk qrupu prosesində iştirak edən ölkədir və onun hansısa planı varsa bu Minsk qrupunun digәr üzvlәri ilә birlikdә şәffaf şәkildә nәzәrdәn keçirilməlidir”.
Pentaqon təmsilçisinin bu sözləri o deməkdir ki, Vaşinqton Moskvanın təkbaşına vasitəçiliyinə mənfi yanaşır və Dağlıq Qarabağda Rusiya sülhməramlılarının yerləşdirilməsinin əleyhinədir. Rusiya sülhməramlılarının Qarabağda yerləşdirilməsi yalnız Azərbaycanın deyil, ABŞ-ın da maraqlarına cavab vermir.
Birincisi, Rusiya Azərbaycan üzərindən İranla sərhəddə çıxacaq.
İkincisi, Kreml Azərbaycanın daxili və xarici siyasətinə təzyiq imkanı əldə edəcək.
Üçüncüsü isə Moskva Bakıya təzyiqi artırmaqla bölgənin enerji resurslarının Avropaya daşınmasına mane olacaq.
Buna görə də Pentaqon təmsilçisi Lavrovdan sonra Azərbaycana səfər etməklə həm Bakı, həm də Moskvaya Vaşinqtonun mesajını çatdırıb ki, Rusiyanın Cənubi Qafqazda təkbaşına hegemonluğunun əleyhinədir və Kremlin bu planlarını pozmaq üçün əlində imkanlar var”- deyə E. Şahinoğlu bildirib.
Son şərhlər