Macarıstan Baş naziri Viktor Orban ABŞ-ın gücləndiyi halda, Avropanın tənəzzül etdiyini bildirib və əlavə edib ki, “Avropa Birliyi parçalanma prosesindədir”.
Elchi.az xəbər verir ki, Macarıstan mətbuatına verdiyi açıqlamada Macarıstan Baş naziri Viktor Orban Ukrayna-Rusiya müharibəsi və Avropa qitəsi ilə bağlı şərh verib. 2025-ci ilin Avropanın son sülh ili olub-olmayacağı ilə bağlı suala cavab olaraq Orban “Bəli. Bu ehtimalı istisna etmək olmaz. Biz sülhə öyrəşmişik. Avropadakı son böyük müharibə 1945-ci ildə başa çatdı və o vaxtdan səksən il keçdi” deyib.
Orban Avropa qitəsində müharibənin nüvə fəlakətinə çevrilməsi qorxusunun qitə əhalisini uzun müddət müharibələrdən uzaq tutduğunu bildirib və deyib: “Bu qorxu 80 il ərzində təsirli olub. Amma indi tamamilə fərqli bir dünya formalaşır”.
Macarıstan Baş naziri Orban iddia edib ki, 18-19 dekabr tarixlərində Avropa Birliyi (AB) Liderlər Zirvəsində verilən bəzi qərarlar və təkliflər Ukraynadakı müharibəni alovlandırmaq və Rusiyanı təhrik etmək məqsədi daşıyır. Orban bildirib ki, “Avropada iki qrup var. Biri müharibə qrupu, digəri sülh qrupudur. Hazırda müharibə tərəfdarı qrup dominantdır. Brüssel müharibə istəyir. Macarıstan olaraq biz də sülh istəyirik”.
Orban qeyd edib ki, 20 il əvvəl Aİ-nin iqtisadi gücü ABŞ-ın gücünə yaxın idi, lakin bu gün ABŞ gücləndikcə Avropa geriləyir. Aİ-nin qərar qəbuletmə prosesində hüquqi boşluqlardan getdikcə daha çox istifadə etməsi iddiası ilə bağlı Orban belə şərh verib: “Aİ parçalanma prosesindədir. Baş verənlər Brüssel bürokratiyasının imperiya ambisiyalarının güclənməsi ilə eyni vaxtda irəliləyən parçalanma prosesidir. Qərarlar Brüsseldə qəbul edilir, lakin üzv dövlətlərdə tətbiq olunmur və beləliklə, birlik dağılır”.
Şayəstə
