Norveç hökuməti 16 yaşdan kiçik uşaqların sosial şəbəkələrdən istifadəsini qadağan edən qanun layihəsi hazırlayır. Məhdudiyyətlər “TikTok”, “Snapchat” və “Roblox” da daxil olmaqla messencerlərə və oyun platformalarına da şamil edilə bilər.
Elchi.az xəbər verir ki, bu barədə hökumətin mətbuat relizinə istinadən “Yevropeyska Pravda” məlumat yayıb.
Uşaq və ailə məsələləri üzrə nazir Lene Voqslidin sözlərinə görə, qanun layihəsi uşaqları və gəncləri zərərli məzmunlardan, asılılıq yaradan funksiyalardan, qanunsuz reklamdan və tanımadıqları şəxslərlə arzuolunmaz təmaslardan qorumağa yönəlib.
Hakimiyyət orqanları dizaynı, funksiyaları və ya məzmunu uşaqların emosional və idrak inkişafına, sağlamlığına və təhlükəsizliyinə mənfi təsir göstərə biləcək platformaları zərərli hesab edir.
Hökumət qanun layihəsi üzərində işləri ilin sonuna qədər yekunlaşdırmağı və onu parlamentə təqdim etməyi planlaşdırır.
Məryəm
