Rusiya ilə əlaqəli hakerlərin Ukraynaya silah tədarükünü izləmək məqsədilə NATO-nun hərbi marşrutları boyunca yerləşən müşahidə kameralarına kiberhücum həyata keçirərək silah və hərbi texnikanın daşınmasını izləməyə çalışıblar.
Elchi.az xəbər verir ki, bu barədə Niderlandın Baş Kəşfiyyat və Təhlükəsizlik Xidməti və Hərbi Kəşfiyyat Xidmətinin birgə bəyanatında bildirilib.
Məlumata görə, genişmiqyaslı kiberəməliyyat Avropadakı, o cümlədən Niderlanddakı hərbi-logistika marşrutları boyunca quraşdırılmış müşahidə kameralarını hədəf alıb. Hakerlərin məqsədi Ukraynaya hansı silah və hərbi texnikanın göndərildiyini müəyyən etmək olub.
Araşdırma zamanı Niderlandda hərbi-logistika marşrutları üzərində yerləşən az sayda IP-kameranın sındırıldığı müəyyən edilib. Hazırda həmin kameralara sahib olan təşkilatlar məlumatlandırılıb və təhlükəsizlik tədbirləri gücləndirilir.
Kəşfiyyat orqanları qeyd ediblər ki, Niderland tranzit ölkəsi kimi rolu və Ukraynaya göstərdiyi fəal hərbi dəstəyə görə Rusiya kəşfiyyatının əsas hədəflərindən biridir.
Bəyanatda həmçinin vurğulanıb ki, sındırılan IP-kameraların əksəriyyəti lazımi şəkildə qorunmayıb. Onlarda standart parollardan istifadə olunub, proqram təminatı yenilənməyib və zavod təhlükəsizlik ayarları dəyişdirilməyib.
