“Nə Səudiyyə Ərəbistanı, nə də İran neft hasilatının azaldılmasında maraqlıdır”.
Axar.az xəbər verir ki, bu haqda millət vəkili Fuad Muradov neft bazarındakı ən son dəyişikliklələ bağlı açıqlama verərkən deyib.
O, neftin qiymətinin düşməkdə davam edəcəyini vurğulayıb:
“Səbəb hasilatı müəyyən edən OPEK üzvü olan əsas ölkələrin – İranın, Səudiyyə Ərəbistanının mövqeyidir. Onlar neftin qiymətinin stabil saxlanmasında əsas rol oynayırlar. Bugünkü proses onu göstərir ki, həmin ölkələr hasilatı azaltmadılar. Nə İran, nə Səudiyyə Ərəbistanı hasilatın azaldılmasına razılıq veriblər. Neftin qiymətinin düşməsi ötən illərdə də müşahidə olunurdu. Amma OPEK ölkələri hasilatı azaltmaqla neftin qiymətini stabil saxlayırdılar. Bu dəfə bunu etmədilər. Neftin qiymətinin ucuzlaşmasının digər səbəbi ABŞ dollarının məzənnəsinin dəyişməsidir. Eyni zamanda burada şist qazının bazara çıxarılması faktı da mühüm rol oynayır. Fikrimcə, son beş ildə enerji bazarında şist qazının ümumi payının artması və ABŞ-ın bunun emalı üçün yeni texnologiyaları tətbiq etməsi bu məsələdə öz təsirini göstərib. Neftin qiyməti ilə bağlı vəziyyətin dəyişməsi daha çox siyasi faktorlardan asılıdır”.
Son şərhlər