Bu yaxınlarda Standartlaşdırma, Metrologiya və Patent üzrə Dövlət Komitəsinin ləğv ediləcəyi ilə bağlı mətbuatda məlumatlar yayılmışdı. İddialar rəsmi şəkildə özünü doğrultmasa da, hesab edilirdi ki, dövlət komitəsinin ləğvinə hazırlıq gedir və yaxın zamanlarda qurum tarixə qovuşacaq. Bundan öncə də bəzi nazirlik və dövlət komitələrinin ləğv edilməsi məsələsi gündəmdə olub.

Ekspertlər və millət vəkilləri hesab edirlər ki, nazirliklərin sayı azaldılmalı, bəzi dövlət qurumları isə birləşdirilməlidir.

Millət vəkili Zahid Oruc  açıqlamasında bildirib ki, müxtəlif qurumların fəaliyyətinin dayandırılması və başqası ilə birləşdirilməsini dünyada gedən iqtisadi problemlərlə bağlamaq düzgün yanaşma deyil.

Onun sözlərinə görə, neftin qiyməti 110 dollar olsaydı belə, Azərbaycanda hökumət strukturlarının islahatını optimal tərkibə gəlib çatana qədər davam etdirmək lazımdır: “Bir sıra strukturların komitə, agentlik və yaxud nazirlik səviyyəsində olmasına heç bir ehtiyac yoxdur. Dünyada ölkələrinin bir çoxunda bu təcrübəyə bizdən əvvəlki illərdə keçilib. Onlar əhalinin hər min nəfərinə düşən məmur sayının kvotasını müəyyən ediblər. Artıq müəyyən edilib ki, hansı sayda və funksiyalara malik olan məmurlar xidmət etməlidir. Bizdə isə çoxlu şişmiş aparatlar, bir-birinin funksiyalarını əldə etmək üçün mübarizə aparan qurumlar mövcuddur”.

Z.Oruc bildirib ki, Standartlaşdırma, Metrologiya və Patent üzrə Dövlət Komitəsinə münasibətdə fikirlər qətiləşməkdədir ki, əgər burada söhbət istehsalatın hansısa bir mühim standartlara uyğunluğunu təmin etməkdən gedirsə, bunun qanunvericilik bazası formalaşıb, bunu da həyata keçirmək üçün məhdud saylı kadr personalı ilə gerçəkləşdirmək olar.

“Qeyd olunan işi yerinə yetirmək üçün ayrıca bir komitənin mövcudluğu tələb olunmurmu? Bu məsələyə də baxıla bilər. O cümlədən kreditləşmə ilə bağlı çoxlu sayda agentliklər, dövlət qurumları və s. mövcuddur. Halbuki onların hamısının “ASAN Xidmət” qaydasında şərtləri müəyyən edilərək vahid qurum yaradıla bilər”.

Millət vəkili qeyd edib ki, dövlət büdcəsində icra orqanlarının, başqa strukturların maliyyələşməsi böyük yer tutur: “Bu artıq mühüm bir çəkiyə malikdir. Onların müxtəlif səlahiyyətləri əldə etmək üçün vuruşmaları bürokratik bəlalar yaradır. Digər tərəfdən də məsuliyyətə sahib olmaq istəmirlər. Demək olar ki, bütün nazirliklərin tərkibində tikinti xidmətləri mövcuddur. Belə olan halda bu qurumlar əsas işlərini buraxırlar”.

Deputat hesab edir ki, bir-birlərinin fəaliyyətini təkrarlayan nazirliklər ya ləğv edilməli, ya da birləşdilməlidir.

Millət vəkili Vahid Əhmədovun sözlərinə görə, Azərbaycanda bir neçə nazirliyin ləğvi gözlənilir. Deputat bildirib ki, Azərbaycanda cəmi 13-15 nazirlik saxlanılmalıdır.

Millət vəkilinin sözlərinə görə, digər nazirliklərin səlahiyyətləri ya birləşdirilməli, ya da ləğv olunmalıdır: “Bazar iqtisadiyyatı sistemində islahatlar, təkmilləşdirilmə gedir və bu daim davam etməlidir. Mütəmadi olaraq ölkə başçısı tərəfindən müəyyən struktur islahatları aparılır, müəyyən qurumlar ləğv edilir, digərləri birləşdirilir. Həmçinin bəzi qurumların səlahiyyətləri digərlərinə verilir. Bu proses davam edir”.

Milli Məclisin üzvü qeyd edib ki, neftin dünya bazarında qiymətinin kəskin aşağı düşməsi, cənab prezident tərəfindən qeyri-neft sektorunun inkişafına diqqətin artırılması, kiçik və orta sahibkarlığın inkişafı bir sıra islahatlara təkan verir: “Elə nazirliklər var ki, bir-birinin işlərini təkrarlayır. Bəzi nazirliklər, komitələr kiçik və orta sahibkarlığa problemlər yaradırlar. Bu baxımdan struktur dəyişikliyi labüddür və bunu etmək lazımdır”.

Məlumat üçün bildirək ki, hazırda Azərbaycanda 19 nazirlik, 10 dövlət komitəsi fəaliyyət göstərir.