Son beş ildə Azərbaycan “Onlayn Azərbaycan” layihəsi vasitəsilə əlamətdar rəqəmsal transformasiyaya nail olub.
Elchi.az xəbər verir ki, bunu rəqəmsal inkişaf və nəqliyyat nazirinin müavini Saməddin Əsədov “Azərbaycan-Qonaqpərvərlik Sahəsində Bağlantı” Sammitində çıxışı zamanı deyib.
O qeyd edib ki, 2021-ci ildə ölkəmizdə internet infrastrukturunun inkişafına dair strateji yol xəritəsinin tərkib hissəsi kimi istifadəyə verilmiş bu təşəbbüsün məqsədi bütün vətəndaşlarımız üçün, xüsusilə də kifayət qədər xidmət olunmayan və ucqar regionlarda yüksək sürətli genişzolaqlı internetə çıxışı təmin etmək olub:
“2025-ci ilin sonuna bu layihə ölkə üzrə tam əhatəyə nail olub. Fiber genişzolaqlı internetə çıxış ev təsərrüfatları və biznes subyektləri üzrə cəmi 9%-dən bu gün demək olar ki, 100%-ə yüksəlib. Bu nailiyyət Azərbaycanın sabit genişzolaqlı internet bazarını əsaslı şəkildə yenidən formalaşdırıb.
Bu transformasiyanın təsiri performans göstəricilərində aydın şəkildə əks olunur. Ookla Speedtest Intelligence məlumatlarına əsasən, ölkə üzrə sabit genişzolaqlı internetin median sürəti 2020-ci ildə təxminən 10 Mbit/saniyədən 2025-ci ilin sonuna doğru təxminən 90 Mbit/saniyəyə yüksəlib”.
Nazir müavini deyib ki, layihə çərçivəsində görülən işlərin 40%-dən çoxu əhalimizin təxminən yarısının yaşadığı kənd ərazilərinə yönəldilib:
“Dövlət–özəl tərəfdaşlıq modeli vasitəsilə köhnə mis şəbəkələrin müasir fiber-optik infrastrukturla əvəzlənməsi nəticəsində biz rəqəmsal uçurumu əhəmiyyətli dərəcədə azaldıb və coğrafiyanın artıq imkanlar üçün maneə olmamasını təmin etmişik”.
