Çərşənbə axşamı NATO, Rusiya və Çinin nüvə siyasətini pisləyib və BMT-nin beynəlxalq konfransı ərəfəsində şəffaflığın artırılması və strateji sabitliyin təmin olunması üçün hər iki ölkəni ABŞ ilə daha sıx əməkdaşlığa çağırıb.
Elchi.az xəbər verir ki, Alyansa daxil olan 32 ölkənin birgə bəyanatında, 1970-ci ildən bəri qlobal silahlara nəzarət sisteminin əsas elementi olan Nüvə Silahlarının Yayılmaması haqqında Müqavilənin (NPT) tam yerinə yetirilməsinə “sarsılmaz sadiqlik” vurğulanıb.
Sənəd gələn həftə Nyu-Yorkda başlayacaq NPT üzrə icmal konfransı ərəfəsində dərc edilib. Bu konfrans Rusiyanın Ukraynadakı müharibəsi, həmçinin ABŞ və İsrailin İranla münaqişəsi fonunda artan geosiyasi gərginlik dövrünə təsadüf edir.
NATO bəyan edib ki, Rusiya “silahlara nəzarət üzrə mühüm öhdəliklərini pozub və məsuliyyətsiz nüvə ritorikasından istifadə edir”, Çin isə “kifayət qədər şəffaflıq təmin etmədən öz arsenalını sürətlə artırır və şaxələndirir”.
NATO Baş katibinin müavini Boris Ruge Reuters agentliyinə şərhində Rusiyanı “nüvə siqnalı verməkdə” ittiham edib və Moskvanın Ukraynada “Oreşnik” tipli raket sistemlərindən istifadə etməsini buna nümunə göstərib.
Cavab olaraq Moskva məsuliyyətli nüvə dövləti statusuna sadiq olduğunu bildirir, Pekin isə ittihamları rədd edərək öz siyasətinin yalnız milli təhlükəsizlik mülahizələri ilə məhdudlaşdığını iddia edir.
Ekspertlərin qiymətləndirmələrinə görə, Rusiya təxminən 4400 döyüş başlığı ilə dünyanın ən böyük nüvə dövləti olaraq qalır, ondan sonra ABŞ və Çin gəlir. NATO bu konfransın risklərin azaldılması və strateji sabitliyin gücləndirilməsinə dair razılaşdırılmış sənədlə yekunlaşacağına ümid edir.
Məryəm
