Rus millətçiləri azərbaycanlı tələbəni yaşadığı evin qarşısında güllələyiblər
Rusiyada öldürülmüş azərbaycanlı fəal Rəsul Xəlilovu qətlə yetirmiş faşist qruplaşması üzərində Moskva vilayətində qurulmuş məhkəmə başa çatmaqdadır.
ANS PRESS-in məlumatına görə, rus millətçilərinin döyüş təşkilatı (BORN) adlandırılan faşist təşkilatının dörd üzvü – Maksim Baklaqin, Vyaçeslav İsayev, Mixail Volkov və Yuri Tixomirov müttəhim kürsüsündə əyləşib. Onlar federal hakim Eduard Çuvaşovun, antifaşistlər İlya Caparidzenin, Fedor Filatovun və İvan Xutorskinin, həmçinin erməni taksi şoferi Sos Xaçikyanın, azərbaycanlı tələbə Rəsul Xəlilovun və tay boks üzrə dünya çempionu Müslüm Abdullayevin qətlində günahkar bilinirlər.
İttiham olunanlar bu gün çıxış ediblər. Volkov, Baklaqin və İsayev qətllərlə bağlı günahlarını etiraf ediblər, amma bunun BORN-a aidiyyəti olmadığını bildiriblər. Şahidlər isə tam tərsini bildiriblər. Onların sözlərinə görə, BORN iştirakçıları faşizmin əleyhinə çıxan bir çox adamları qətlə yetiriblər.
1991-ci ildə Azərbaycanda doğulmuş Rəsul Tahir oğlu Xəlilov 2009-cu il sentyabrın 3-də Moskvada yaşadığı evin qarşısında güllə ilə vurulub. O, Rusiya Ədliyyə Nazirliyinin Beynəlxalq Hüquq İnstitutunun tələbəsi olub.
ANS PRESS