Virtualaz.org saytının əməkdaşı xəbər verir ki, Milli Məclisin Sosial siyasət komitəsinin sədri Hadi Rəcəbli və komitənin sədr müavini Musa Quliyev aksiya iştirakçıları ilə görüşüblər.
Hadı Rəcəbli bildirib ki, bu cür etiraz aksiyalarının keçirilməsinə ehtiyac yoxdur: “Nümayəndəniz gəlib problemi desin. Bu şəkildə etiraz etmək olmaz. Biz də şikayətinizə baxacağıq”.
Hadı Rəcəbli daha sonra bildirib ki, şəhid ailələri və Qarabağ əlillərinin iştirakı ilə İşçi qrupu yaradılacaq. Fevralın 18-də İşçi qrupu, Maliyyə Nazirliyi, Konstitutsiya Məhkəməsi və sığorta şirkətlərinin nümayəndələrinin iştirakı ilə müzakirə keçiriləcək.
H.Rəcəbli sığorta pulunun ödənilməsi üçün tədbirlər görüləcəyini vəd edib.
* * *11:58
Virtualaz.org saytının hadisə yerində olan əməkdaşı xəbər verir ki, aksiya iştirakçıları Milli Məclisin əsas giriş qapısına qədər gedə biliblər.
Lakin polis onların qarşısını almağa çalışır.Buna görə də aksiya iştirakçıları ilə polislər arasında gərginlik yaşanır.
Şəhid ailələri binaya daxil olmağa çalışırlar.
* * *11:25
Qarabağ əlilləri və şəhid ailələri onlara çatacaq pulun ödənilməməsinə etiraz olaraq bu gün Milli Məclisin qarşısında aksiya keçirirlər.
Virtualaz.org saytının hadisə yerində olan əməkdaşı xəbər verir ki, aksiya iştirakçıları sığorta pulunun ödənilməsini tələb edirlər. Hələlik aksiya iştirakçılarını heç kim qəbul etməyib. Etirazçılar isə problemləri həll olunanadək aksiyalar keçirməkdə israrlı olduqlarını deyirlər.
Qeyd edək ki, Qarabağ əlilləri və şəhid ailələri aksiyalara hazırlıq məqsədilə imza toplayıblar. Sənədə 200 nəfərədək əlil və şəhid ailəsi imza atıb.
Qeyd edək ki, 13500 şəhid ailəsinə 11 min manat sosial sığorta haqqı ödənilməlidir. Onlar 1994-cü ildən bu yana onlara verilməli olan sığorta pulunu ala bilmirlər.
I qrup Qarabağ əlilləri 8800 manat, II qrup Qarabağ əlilləri 6600 manat, III qrup əlillər isə 4400 manat almalıdırlar. Hazırda 11 min əlil var.
Xatırladaq ki, ötən əsrin 90-cı illərinin əvvəllərində hərbi xidmətə çağırılmış vətəndaşlar Silahlı Qüvvələrdə hərbi xidmətə başladığı andan dövlət tərəfindən məcburi şəxsi sığortalanıblar. Müdafiə Nazirliyi də bunun müqabilində “Azərsığorta” Dövlət Sığorta Şirkətinin hesabına pul köçürüb.
2000 şəhid ailəsi və Qarabağ əlilinə sığorta ödənməsinə dair məhkəmə qərarları da var.
Konstitusiya Məhkəməsi isə 2014-cü il yanvarın 28-də hərbi qulluqçulara şamil olunan icbari sığorta pulunun ödənilməsinə dair qətnamə çıxarıb. Həmin sənədə əsasən Milli Məclis məsələ ilə bağlı müvafiq qərar verməli idi.