Misir mediasına danışan yüksək səviyyəli mənbələr Qəzzanın gələcəyi ilə bağlı hərtərəfli planın bir hissəsi olaraq HƏMAS silahlarının müvəqqəti olaraq Misirə ötürülməsinə dair qərarın olmadığını bildirib.
Elchi.az xəbər verir ki, Misirin “Əl-Qahirə əl-İhbariyyə” kanalına danışan yüksək səviyyəli mənbələr İsrail dövlət televiziyası KAN da daxil olmaqla, İsrail mediasının “Misir Qəzza zolağında müharibəyə son qoymaq üçün hərtərəfli planın bir hissəsi olaraq HƏMAS-ın silahlarını himayəsinə götürməyi təklif edib” iddialarını rədd edib.
Misirin yüksək səviyyəli mənbələri Misir və Qətərin təqdim etdiyi təklifin Qəzzada 60 günlük müvəqqəti atəşkəs haqqında olduğunu xatırladıb və Həmas da bunu qəbul edib.
İsrail mediası bildirir ki, iddia edilən təklifə Qəzza zolağının bir neçə il ərzində texnokratlardan ibarət hökumət tərəfindən idarə olunması daxildir.
Söz mövzusu texnokratik hökumətin Fələstin Administrasiyasının himayəsində olacağı və HƏMAS-ın Qəzzadan kənarlaşdırılacağı iddia edilən xəbərlərdə bu iddialar yer alıb:
“Misirin təklifi Qəzzada müharibəyə son qoymaq üçün aparılan istənilən danışıqlarda ən mürəkkəb məsələlərdən biri olan Həmas-ın silahlarına toxunur. Silahlar Misir kimi regional vasitəçilərin müdaxilələrinə baxmayaraq, İsrail və Həmas arasında uzunmüddətli atəşkəs və ya siyasi razılaşmanın əldə edilməsinə ən böyük maneə olaraq qalacaq”.
Nuranə Məmmədova
