1920-ci ildə müstəqil ölkəmizi hərbi yolla süquta uğradan imperiya cəlladları xalqımızın azadlıq carçılarını da qətlə yetirdi. Yetmiş il ərzində dilimizə, milli sərvətlərimizə düşmən kəsilən qüvvələr mənəvi soyqırımı həyata keçirsələr də, buna nail ola bilmədilər. Çünki xalqımızın əvəzsiz övladı Heydər Əliyev siyasi səhnədə idi.
Ulu öndər ən mürəkkəb dövrlərdə milli kimliyimizi, ana dilimizi, milli ruhumuzu təkcə qorumaqla kifayətlənmir, eyni zamanda respublikamıza düşmən mövqedən çıxış edən nankor qonşularımızın anti-Azərbaycan fəaliyyətinə ciddi maneələr yaradırdı. Məhz onun siyasi varlığı bu qüvvələrin rahatlığını pozurdu. İnsan talelərinə biganə qalan Qorbaçovun ikiüzlü siyasətinə etiraz əlaməti olaraq Heydər Əliyevin SSRİ rəhbərliyindən istefasından sonra Azərbaycan həyatının ən təhlükəli və mürəkkəb mərhələsinə daxil oldu. Heydər Əliyevin siyasi səhnədə olmaması Kremlə erməni maraqlarına açıq şəkildə xidmət etmək imkanı verdi. Qarabağın separatizm ocağına çevrilməsi, bu tarixi diyarın Ermənistana verilməsi kimi sərsəm iddialar artıq gündəlik məsələyə çevrildi.
Azərbaycan xalqı bu riyakar siyasətə etiraz olaraq meydanlara çıxdı. Lakin cavab olaraq SSRİ prezidenti Mixail Qorbaçovun birbaşa əmri ilə ölkəmizə qoşun yeridildi, Bakıda xüsusi qəddarlıqla qətliamlar törədildi. Başsız qalan Azərbaycan matəmə qərq oldu. Bu qanlı hadisə xalqımızı qorxutmaq məqsədi daşısa da düşmən istədiyinə çata bilmədi. Əksinə, xalqımız daha da möhkəmləndi və sübut etdi ki, zor-güc ilə milli iradəni sındırmaq mümkün deyil. Günahsız insanların qətli ilə nəticələnən 20 Yanvar qırğınından sonra ölkə rəhbərinin qaçması, meydan qəhrəmanlarının isə yoxa çıxması vəziyyəti daha da ağırlaşdırdı. Düşmən qətliamı gizlətmək və respublikamızı informasiya blokadasına salmaq üçün dövlət televiziyasının enerji blokunu partlatdı. Nəticədə xalqımız baş verən faciəni dünyaya çatdırmaq imkanından məhrum oldu.
Azərbaycan qan içindəydi, xalq taleyin ümidinə buraxılmışdı, dünya isə bu cinayətdən xəbərsiz qalmışdı. Bütün təhlükələrə baxmayaraq Heydər Əliyev Moskvada Azərbaycan nümayəndəliyinə gələrək SSRİ rəhbərliyinə qarşı sərt bəyanatla çıxış etdi. Xalqımıza qarşı qanlı qətliam törətmiş şəxslərin ciddi cəzalanmasını tələb edərək informasiya blokadasını yarıb səsimizi dünyaya çatdırdı.
Dünya imperiyanın çirkin əməllərini görməklə yanaşı əliyalın halda tankların üzərinə gedən xalqımızın qəhrəmanlığına da şahid oldu. Azərbaycan xalqının azadlıq və müstəqillik uğrunda mübarizəsi bütün dünyaya bəyan etdi ki, suveren yaşamaq bizim haqqımızdır və heç kim hərb və zorakılıq yolu ilə səsimizi boğa bilməz. Müstəqillik arzularımızı susdurmaq üçün qaldırılan süngülər nəticəsiz qaldı. 20 Yanvar faciəsi xalqımızın birliyini daha da möhkəmləndirdi, ölkədə milli şüurun yüksəlməsinə təkan verdi. Məhz bunun nəticəsi olaraq qısa müddət sonra Azərbaycan övladlarının qanı bahasına tarixi müstəqilliyinə qovuşdu.
20 Yanvar faciəsinə hüquqi qiymətin verilməsi təşəbbüsü Ulu öndər Heydər Əliyevin adı ilə bağlıdır. 1994-cü il martın 29-da Azərbaycan parlamenti 1990-cı il yanvarın 20-də Bakıda törədilmiş faciəli hadisələr haqqında qərar qəbul etdi. Bu qərar nəticəsində 20 Yanvar faciəsi öz hüquqi və siyasi qiymətini aldı, hadisələrin məsuliyyəti açıq şəkildə müəyyənləşdirildi. Şəhid olmuş, sağlamlıq imkanlarını itirmiş ailələr dövlət qayğısı ilə əhatə olundu. Məhz Heydər Əliyevin rəhbərliyi ilə bu prosesə ciddi dövlət nəzarəti tətbiq edildi, sosial təminat tədbirləri həyata keçirildi və bu tədbirlər bu gün də kompleks şəkildə davam etdirilir.
Artıq 20 Yanvar şəhidlərinin ruhu şaddır.
Vətən müstəqildir və Prezident İlham Əliyevin liderliyi ilə ölkəmiz tarixinin ən qüdrətli dövrünü yaşayır. İşğaldan azad olunan yurd yerlərində dalğalanan Azərbaycan bayrağı küləklə yox, xalqımızın ruhu ilə dalğalanır. O bayraq ki, onu ucaltmağı, qorumağı əziz şəhidlərimizdən öyrəndik. 20 Yanvar tarixi bütün dünyaya həm də onu göstərdi ki, hər birimiz Azərbaycan uğrunda canlı şəhidik! 44 günlük Vətən müharibəsində və bir gün çəkən antiterror tədbirlərində hamı bu bəlli həqiqətin bir daha şahidi oldu.
Rəşad Mahmudov,
YAP İdarə Heyətinin üzvü,
Milli Məclisin deputatı
