Meksikada gənclər tərəfindən təşkil olunmuş qruplar artan cinayətkarlığa, korrupsiyaya və cəzasızlığa etiraz etmək üçün küçələrə çıxdılar. Nümayişçilər ilə polis arasında toqquşmalar baş verdi, nəticədə 100 polis əməkdaşı da daxil olmaqla 120 nəfər yaralandı.
Elchi.az xəbər verir ki, Meksikada minlərlə insan artan cinayətkarlığa, korrupsiyaya və cəzasızlığa etiraz etmək üçün küçələrə çıxdı. Paytaxt Mexiko şəhərində gənclər tərəfindən təşkil edilən etiraz aksiyası hökumətə qarşı geniş tənqidlərə səbəb oldu və nümayişçilər ilə polis arasında toqquşmalara səbəb oldu. Mexiko şəhərinin İctimai Təhlükəsizlik Katibi Pablo Vaskes mətbuat konfransında 100 polis əməkdaşı da daxil olmaqla 120 nəfərin yaralandığını və yaralanan polislərdən 40-nın xəstəxanaya yerləşdirildiyini bildirdi. Vaskes həmçinin soyğunçuluq və hücum da daxil olmaqla cinayətlərə görə 20 nəfərin həbs olunduğunu bildirdi.
Paytaxtda minlərlə nümayişçi toplaşaraq Meksika prezidenti Klaudiya Şeynbaumun yaşadığı Milli Sarayın ətrafındakı barrikadaları dağıtdı. Polis etirazçıları dağıtmaq üçün göz yaşartıcı qazdan istifadə etdi. 1 noyabrda Ölülər Günü tədbiri zamanı qətlə yetirilən Uruapan meri Karlos Manzonun tərəfdarları da nümayişdə iştirak ediblər. Bir çoxları üzərində “Hamımız Karlos Manzuyuq” yazılı plakatlar tutublar. Meksika prezidenti Klaudiya Şeynbaum bildirib ki, digər şəhərlərdə də keçirilən yürüşlər onun hökumətinə qarşı çıxan sağçı siyasətçilər tərəfindən maliyyələşdirilib.
Şayəstə
