Fransa prezidenti Emmanuel Makron ABŞ və İsrailin İrana qarşı həyata keçirdiyi hava hücumları ilə bağlı deyib: “İrana hücumlar beynəlxalq hüququn hüdudlarından kənarda həyata keçirilib və biz bunu təsdiq edə bilmərik”.
Elchi.az xəbər verir ki, Fransa prezidenti Emmanuel Makron televiziya ilə xalqa müraciətində Yaxın Şərqdəki vəziyyətlə bağlı açıqlamalar verib. ABŞ və İsrailin İranı hədəf alan əməliyyatını tənqid edən Makron deyib: “ABŞ və İsrail hərbi əməliyyatlara başlamaq qərarına gəliblər. Bu əməliyyatlar beynəlxalq hüquq çərçivəsindən kənarda həyata keçirilib və biz bunu təsdiq edə bilmərik”.
“Böhrana görə İran məsuliyyət daşıyır”
Makron hücumları təsdiqləmədiyini bildirsə də, böhranın eskalasiyasına görə əsasən İranın məsuliyyət daşıdığını iddia edib, Tehran administrasiyasını nüvə proqramına və bölgədəki proksi qüvvələrə dəstəyinə görə tənqid edib. Makron çıxışında İsrailə xəbərdarlıq edib və bildirib ki, Livana qarşı mümkün quru əməliyyatı strateji səhv və çox təhlükəli eskalasiya olacaq.
Şərqi Aralıq dənizinə təyyarə gəmisi göndərildi
Bölgədə təhlükəsizlik tədbirlərini artırdıqlarını açıqlayan Makron, Fransa vətəndaşlarını, bölgədəki müttəfiq ölkələri və dəniz ticarət yollarını qorumaq üçün ordunun səfərbər olunduğunu bildirdi. Makron bu çərçivədə “Şarl de Qoll” təyyarə gəmisini Şərqi Aralıq dənizinə göndərdiklərini açıqladı.
Şayəstə
