Livan Prezidenti Cozef Aun hesab edir ki, Hörmüz boğazındakı böhran şəraitində İraqdan və Fars körfəzindən dünya bazarlarına təcili neft tədarükü Livan və Suriya limanları vasitəsilə həyata keçirilə bilər.
Elchi.az xəbər verir ki, bu barədə siyasətçi Beyrutda keçirilən iqtisadi inteqrasiya forumunda iştirak edən Suriya hökumət nümayəndə heyəti ilə görüşdə bildirib.
“Ölkələrimizin Aralıq dənizi sahilində yerləşməsi onları regional gərginlik fonunda neftin daşınması üçün münasib alternativ marşrutlara çevirir”, – deyə qeyd edib.
Aunun sözlərinə görə, Livan və Suriya arasında balanslaşdırılmış və qarşılıqlı faydalı münasibətlərin qurulması hər iki xalqın rifahı naminə inteqrasiya və inkişaf üçün bu unikal imkandan yararlanmağa şərait yaradacaq.
Öz növbəsində Suriyanın keçid hökumətinin iqtisadiyyat və sənaye naziri Məhəmməd Nidal əl-Şaar cavab nitqində Dəməşq və Beyrutun müharibədən sonrakı bərpa prosesi ilə məşğul olacaq iqtisadi nüvənin yaradılması üçün işgüzar dairələrin səylərini birləşdirmək niyyətində olduğunu bildirib. “Livan və Suriya regiona və hər iki ölkəyə fayda gətirəcək yeni quru marşrutunun əsas iştirakçılarıdır”, – deyə o vurğulayıb.
Məryəm
