2023-cü ildə Belarus Kollektiv Təhlükəsizlik Müqaviləsi Təşkilatına (KTMT) sədrlik edəcək.
Elchi.az News.am-a istinadən xəbər verir ki, ötən ilin noyabrında KTMT Kollektiv Təhlükəsizlik Şurasının genişləndirilmiş sessiyasında çıxış edən Belarus prezidenti Aleksandr Lukaşenko Belarusun sədrliyinin “Həmrəylik və əməkdaşlıq yolu ilə sülh və təhlükəsizliyə doğru” devizi altında keçirilməsini təklif edib.
Lukaşenko Belarusun 2023-cü ildə KTMT-yə sədrliyinin ilk məqsədini böhranlı vəziyyətlərin nizamlanması və təşkilatın məsuliyyət zonasında sabitliyin pozulmasının qarşısının alınması adlandırıb. Sonra o, Belarusun KTMT-də gərginliyin azaldılmasına, münaqişə potensialının azaldılmasına, habelə KTMT üzvlərinin birgə hərəkətləri vasitəsilə qarşılıqlı etimad səviyyəsinin artırılmasına yönəlmiş bütün mümkün diplomatik səyləri göstərəcəyini qeyd edib.
Eyni zamanda, Lukaşenko kollektiv təhlükəsizlik sisteminin güc və vasitələrinin istifadəsini əhatə etməyən antiböhran mexanizmlərindən istifadənin zəruriliyindən danışıb.
Bundan əlavə, Belarus rəhbəri bəyan edib ki, KTMT-yə sədrlik dövründə Minsk başqa ölkələrin və ixtisaslaşmış təşkilatların nümayəndələrinin mümkün dəvəti ilə müvafiq idarələrin iştirakı ilə bir sıra tədbirlərə təşəbbüs göstərəcək.
Yeganə