“Rail Rzayevlə Əliağa Hüseynovu yan-yana qoymaq dağla dərəni bərabərləşdirmək kimidir, həm ağıl, həm savad, həm də zabit qüruruna görə. Şükür ki, Əliağa onunla qohumluğunu danır, bu çox yaxşı faktdır, hesab edirəm ki, onun özü sağ olsaydı Əliağanı heç qohum kimi qəbul etməzdi”.

Bunu  keçmiş müdafiə naziri Rəhim Qazıyev Əliağa Hüseynovun Rail Rzayevlə qohumluğunu danmasına münasibət bildirərkən deyib.

R.Qazıyev Əliağa Hüseynovla müqayisə edilməyin Rail Rzayevin əziz ruhuna hörmətsizlik olduğunu vurğulayıb:

“Hər ikisi general-leytenant idi, ancaq əgər Əliağa Hüseynov o rütbəni alandan sonra erməniyə bir güllə atıbsa mən adımı dəyişərəm. Onları müqayisə etmək 1941-45-ci il müharibəsindəki Jukovla Leonid İliçi bərabər tutmaq kimidir. Əliağa arxada əsgərliyə getməyənlərin məsələsini həll etməklə məşğul olub. Döyüş zonasında, əhəmiyyətli bir idarəni işlək vəziyyətə gətirməkdə əvəzsiz xidməti olan bir adamla onun müqayisə olunması heç cür mümkün olmaz”.

“Onun haqqında bunları deməsəm özümü günahkar sayaram”- deyən keçmiş nazir Rail Rzayevin Azərbaycanın Hava Hücumundan Müdafiə Qüvvələləri ilə Hərbi Hava Qüvvələlərinin birləşdirilməsi, gücləndirilməsi istiqamətində əvəzsiz xidmətlərindən də danışıb:

“Rail Rzayev Azərbaycan Silahlı Qüvvələrinin ən sayseçmə, savadlı, ağıllı, zabit şərəfini yüksək səviyyədə qoruyan, şəxsiyyətini çox qiymətli bilən insan idi. Mən nazir gəldiyim vaxtda da o, MDB Silahlı Qüvvələrinin Bakıdakı Reklamasiya Stansiyası deyilən mərkəzin rəisi idi, rütbəsi polkovnik idi. Həmin stansiyada Xəzəryani dövlətlərdən, həm də Ermənistan və Gürcüstandan gətirilmiş hərbi hava hücumundan müdafiə raketlərinin keyfiyyəti, yanacağı yoxlanılırdı, təmir olunurdu və atəş vəziyyətinə hazırlanırdı. Rail Rzayev SSRİ dönəmində hava hücumundan müdafiə qüvvələrinin sayılıb seçilən zabiti idi. Sözün düzünü dediyinə, ötkəmliyinə görə Müdafiə Nazirliyində ona münasibət birmənalı deyildi, çoxu onu istəmirdi. İki-üç dəfə ünsiyyət qurandan sonra gördüm ki, çox savadlı oğlandır. SSRİ dağılandan sonra, Azərbaycanın hava hücumundan müdafiə qüvvələlərini rus ordusu təmamilə yararsız hala salmışdı. Bir A12 ilə gəlib Bakını, strateji nöqtələrimizi bombalaya bilərdilər. Həmin dövrdə hava hücumundan müdafiə qüvvələlərinin cəmi 75-lik, 125-lik və 200-lük raketləri vardı. Mən onu hava hücumundan müdafiə qüvvələlərinə rəhbərlik etmək üçün dəvət etdim. Rəhbərlik etdiyi qısa müddət ərzində həm ağlı, həm prinsipiallığı, həm istedadı ilə bir dəqiqə belə sakit durmurdu. Birlikdə indiki Texniki Universitetə gedib avtomatika-mexanika və rabitə fakültələrinin dördüncü, beşinci kurslarından əlliyə yaxın savadlı, bacarqılı tələbə seçdik. Qısa müddətdə onları peşəkarcasına hazırladı və nazirliyin yanında hava hücumundan müdafiə, müşahidə qurğusunu qısa müddətdə istifadəyə verdi. İki aydan sonra hava hücumundan müdafiə qurğularının hamısı saz hala gətirildi. Az müddətdə Azərbaycanın Hava Hücumundan Müdafiə Qüvvələləri hava sərhədlərini pozan istənilən raketi vurmaq gücündə idi. Həmin mərkəzi işə salandan sonra rəhmətlik Əbülfəz Elçibəyi ora dəvət etdim. Elçibəy hava məkanını müşahidə edən 20-22 yaşlı gənclərimizə baxıb çox fərəhləndi. O zaman müdafiə nazirliyində Hava Hücumundan Müdafiə Qüvvələləri ayrı, Hərbi Hava Qüvvələləri ayrı idarə idi. Daha sonra o, yanıma gəlib gəlib operativliyi təmin etmək məqsədilə həmin kamanda pultunda Hərbi Hava Qüvvələlərinin bir dispetçerinin oturmasını təklif etdi. Müharibə getdiyinə görə hava məkanı pozulan kimi həmin dispetçer vaxt itirmədən Hərbi Hava Qüvvələlərinə komanda versin, dərhal tədbir görülsün. Həmçinin iki idarəni birləşdirmək təklifini də verdi və mən onun təklifini qənaətbəxş hesab edərək Hava Hücumundan Müdafiə Qüvvələləri ilə Hərbi Hava Qüvvələlərini birləşdirdim. Özü də həmin idarənin ilk rəisi, komandanı oldu. Mən istefa verib gedənə qədər Rail Rzayevin müstəsna xidmətləri sayəsində Azərbaycanın Gürcüstandan başlamış İranla sərhəddinə qədər hava hücumundan müdafiə sistemi yaradılmışdı və yüksək səviyyədə qorunurdu. O, həmçinin keyfiyyətsiz, atəşə hazır olmayan, raketləri, raketlərin atəş qurğularını artıq döyüşə hazır vəziyyətə, texniki saz vəziyyətə gətirmişdi”.

R. Qazıyev son olaraq Ali Baş Komandana və Rail Rzayevin qızına müraciət edib:

“Qızı əmin olsun ki, ataları bildiklərindən də çox yüksəkdə dururdu və Azərbaycanın Hava Hücumundan Müdafiə Qüvvələləri və Hərbi Hava Qüvvələlərinin formalaşıb döyüşə hazır vəziyyətə gətirilməsində onun müstəsna xidməti var. Təəssüf ki, belə bir insanı xaincəsinə məhv etdilər. Ona güllə atan və ya atdıran kəs Azərbaycan xalqının düşmənidir, çünki biz onu itirməklə əvəzsiz bir mütəxəssisi itirdik. Çox istərdim ki, Ali Baş Komandan onun qatilinin tapılması üçün yenidən tapşırıq versin, xain gülləni vuran və ya vurduran sifarişçi millətə bəlli olsun.

Elə bir dəyərli generalın yoxluğu Azərbaycan silahlı qüvvələrinin ən ağır itkilərindən biridir. Mən onun ailəsinə, onu sevənlərə, yetirdiyi zabitlərə, tələbələrinə bir daha başsağlığı verirəm. Ona Allahdan rəhmət, davamçılarına da uğurlar diləyirəm”.

Xatırladaq ki, mərhum genarlın qızı Rahilə Rzayeva bu gün sensasion açıqlamalarla çıxış edərək bəzi məqamlara aydınlıq gətirib, bu zaman Rail Rzayevin general qudası Əliağa Hüseynovun bir paxırını açıb:

“Rail Rzayev öləndən sonra Əliağa Hüseynov müsahibə verərək onunla qohum yox, dost olduğunu deyir. Halbuki qətldən əvvəl hər yerdə deyirdi ki, Rail Rzayev mənim qudamdır. Rail Rzayevin birinci ailəsindən olan qızlarından biri onun qardaşının oğlunda ərdədir. Əliağa Hüseynov düz etmir. Vaxtilə sinəsinə vururdu ki, qudamdır. Ziya Məmmədovla qohum olandan sonra, Rail Rzayev qətlə yetiriləndən sonra qudalıq yaddan çıxdı”…