İsrailin müdafiə naziri Yisrael Katz Qəzza şəhərində “cəhənnəmin qapılarının açıldığını” deyib və şəhəri işğal etmək üçün hücumları gücləndirməklə hədələyib.
Elchi.az xəbər verir ki, Müdafiə naziri Katz sosial mediada verdiyi açıqlamada, İsrail ordusunun işğalçı hücumları çərçivəsində ilk dəfə Qəzza şəhərində çoxmərtəbəli binaya hücum edəcəyi ilə hədələyib.
“Qəzzada cəhənnəmin qapıları açılır” deyən Katz, HƏMAS-ın ya İsrailin hücumlarını dayandırmaq, o cümlədən silahlarını yerə qoymaq və bütün məhbusları azad etmək şərtlərini qəbul edəcəyini, ya da “aradan qaldırılacağını” əlavə edib.
“Qapılar açıldıqdan sonra bağlanmayacaqlar və İsrail ordusunun hücumları şiddətlənəcək” deyən Katz, 1 milyon fələstinlinin yaşadığı şəhərə şiddətli hücumlar edəcəklərini bildirib.
İsrail ordusu Qəzzaya hücumları intensivləşdirib
İsrail ordusunun sözçüsü Aviçay Adraee sosial mediada Qəzzanı işğal etmək üçün hücumlarının əhatəsini genişləndirəcəklərini açıqlayıb.
Şəhərdəki binalara şiddətli hücumlara başlayacaqlarını bildirən Adraee, işğal üçün həyata keçirəcəkləri hücumları əsas gətirərək, dəfələrlə köçkün vəziyyətinə düşmüş fələstinliləri şəhəri tərk etməyə çağırıb.
İsrail ordusu avqustun 29-da “təhlükəli qarşıdurma zonası” elan etdiyi Qəzza şəhəri, Zeytun və Sabra şəhərlərinin kənarlarına intensiv hücumlarını davam etdirir.
İsrail Təhlükəsizlik Kabineti avqustun 8-də Qəzzanın şimalındakı şəhərin işğalı planını təsdiqləyib.
Plana görə, birinci mərhələdə təxminən 1 milyon fələstinli cənuba köçürüləcək, şəhər sıx hücumlardan sonra mühasirəyə alınaraq işğal ediləcək.
İkinci mərhələ Qəzzanın şəhər mərkəzində böyük ölçüdə xarabalığa çevrilmiş qaçqın düşərgələrinin işğalını nəzərdə tutur.
İsrail 1967-ci ildən 2005-ci ilə kimi 38 il Qəzza zolağını işğal edib. Hazırda təxminən 2,3 milyon fələstinlinin yaşadığı Qəzza zolağı 18 ildir ki, ağır blokadadadır.
Nuranə Məmmədova
Son şərhlər