“İsrail güclü ölkədir və heç vaxt terrora təslim olmayacaq”.
Elchi.az xəbər verir ki, bunu İsrailin xarici işlər naziri Yair Lapid ABŞ, Bəhreyn, Mərakeş, Misir, Birləşmiş Ərəb Əmirlikləri (BƏƏ) XİN başçıları ilə birgə keçirdiyi mətbuat konfransında deyib.
“Terrorçuların məqsədi bizi qorxutmaq, əlaqələrimizin yaranmasının qarşısını almaq, bölməkdir. Biz buna icazə verməyəcəyik, onlar uğursuzluğa uğrayırlar. Onlara icazə verməyəcəyik ki, bizim siyasətimizə diktə etsinlər. İsrail güclü ölkədir və heç vaxt terrora təslim olmayacaq. Biz sülh yoluna davam edəcəyik və mən bu məsələdə tək deyiləm, bu gün bu görüşdə iştirak edən nazirlər də bu fikri bölüşür.
Biz bu gün burda tarix yazırıq. Bizim əməkdaşlığımız müxtəlif sahələri əhatə edərək dərinləşəcək. Bizim güclənən münasibətlərimiz İranı və onun havadarlıq etdiyi qüvvələri narahat edir”.
İsrail XİN başçısı bildirib ki, Negev Sammitinin daimi keçirilməsi barədə razılıq əldə olunub.
“Biz bu gün dostlarımız və ABŞ kimi tərəfdaşlarımızla birlikdə regionun bütün xalqları, həmçinin fələstinlilər üçün bir qapı açır və terroru, düşmənçiliyi əməkdaşlıq və uğurla əvəz etməyi təklif edirik”, – Yair Lapid vurğulayıb.
Mətbuat konfransında çıxış edən ABŞ dövlət katibi Entoni Blinken bildirib ki, bir neçə il əvvəl belə bir görüşü təsəvvür etmək qeyri-mümkün idi.
O deyib ki, İsrail və region ölkələri arasında əlaqələr inkişaf edir, qarşılıqlı səfərlər baş tutur, xalqlar bir-birini tanımağa cəhd edir: “ABŞ bu regionu dəyişən prosesi dəstəkləyib və dəstəkləməyə davam edəcək”.
Blinken deyib ki, dərinləşən əlaqələr Fələstin və İsrail münaqişəsinə “iki dövlət” həll yolu istiqamətində mühit yaradılmasına töhfə verə bilər: “Dostlar və tərəfdaşlar olaraq biz İran və onun havadarlıq etdiyi qüvvələr də daxil olmaqla ortaq təhdidlərə qarşı birgə işləməliyik”.
Bəhreyn Krallığının xarici işlər naziri deyib ki, münasibətlərin güclənməsi regional inkişaf, təhlükəsizlik sahəsində əməkdaşlıq üçün imkanlar vəd edir: “Biz dayanıqlı əlaqələr, qarşılıqlı, səmimi asılılıq yaratmalıyıq. Biz regiona göstərməliyik ki, birgə işləyərək nələrə nail ola bilərik. Biz bütün sahələrdə əməkdaşlıq üçün böyük imkanlar görürük. Bu forum qarşılıqlı əlaqələr və çoxtərəfli əməkdaşlıq üçün imkanlar təqdim edir”.
Misirin xarici işlər naziri çıxışında İsrail-Fələstin münasibətlərinə toxunub. O deyib ki, Misir “iki dövlət” həll yolunu dəstəkləyir və ötən illər ərzində bu münaqişənin sona çatması üçün çalışıb: “”Biz terrorizm və ekstremizmlə mübarizə aparmalı, kənar qüvvələrin regiona müdaxiləsinə imkan verməməliyik. Mövcud münasibətləri dərinləşdirməkdə maraqlıyıq, bu həm regional, həm də qlobal səviyyədə səmərə verəcək.”
Mərakeşin xarici işlər naziri ölkəsi ilə İsrail arasında münasibətlərə toxunub: “Bizim mesajımız odur ki, sülhə, sülh içində birgə yaşayışa inanırıq. Regionda müsbət dinamika, xalqlarımız arasında münasibətlərlə bağlı fərqli narrattiv yaratmaq üçün buradayıq. Bu müsbət dinamika xalqlar tərəfindən hiss edilməli, yeni üfüqlər açılmalıdır. Biz inanırıq ki, sülh mümkündür”.
BƏƏ-nin xarici işlər naziri isə çıxışında deyib ki, İsrail və BƏƏ terrorla mübarizədə həmrəydir: “Əlaqələr üçün böyük potensial var, hamı bunu bilir. Biz imkanlardan istifadə etmək istəyirik”.
Son şərhlər