İranın xarici işlər naziri Hüseyn Əmir Abdullahiyan ABŞ administrasiyasını “təhdid dilindən əl çəkməyə və bölgədəki problemləri siyasi üsullarla həll etməyə” çağırıb və ölkəsinə qarşı istənilən hücuma “qətiyyətli və tez” cavab verəcəklərini bəyan edib.
Elchi.az xəbər verir ki, İranın rəsmi xəbər agentliyi İRNA-nın məlumatına görə, paytaxt Tehranda keçirilən Nazirlər Şurasının iclasında çıxış edən Abdullahiyan regionda İranın dəstəklədiyi qrupların ABŞ qüvvələrini hədəf almasından sonra artan Tehran-Vaşinqton gərginliyini dəyərləndirib.
Bölgədəki qrupların “işğala qarşı bir reallıq” olaraq ortaya çıxdığını bildirən Abdullahiyan, “ABŞ təhdidedici ifadələr işlətməyi və başqalarını günahlandırmaqdan əl çəkməli və siyasi həll yoluna diqqət etməlidir” deyib.
Bəzi ABŞ rəsmilərinin hücum təhdidlərinə işarə edən Abdullahiyan, “İranın təhdid şərtlərində cavabı qəti və sürətli olacaq” deyib.
Yanvarın 28-də İordaniya-Suriya sərhədindəki ABŞ hərbi bazasına kamikadze pilotsuz uçuş aparatı ilə həyata keçirilən hücumda 3 ABŞ əsgəri şəhid olub, 40-dan çox əsgər yaralanıb.
ABŞ rəsmiləri, xüsusilə Bayden, İranın dəstəklədiyi qrupları hücuma görə məsuliyyət daşıdığını və hücuma ABŞ-ın seçdiyi vaxt və yerdə cavab veriləcəyini bildirib.
İran sözügedən hücumla əlaqəsi olduğu iddialarını rədd edərək, “Bölgədəki müqavimət qüvvələri qərar və hərəkətlərində İrandan təlimat almır” ifadəsini işlədib.
İnqilab Keşikçiləri Ordusunun Baş Komandanı general-mayor Hüseyn Selami müharibə istəmədiklərini, lakin ölkələrinə qarşı heç bir təhlükəni cavabsız qoymayacaqlarını bildirib.
Şayəstə Hüseynova
Son şərhlər