İran İsfahanın şərq hissəsində vurulduğu bildirilən İsrailə məxsus “Hermes 900” silahlı pilotsuz uçuş aparatının (PUA) görüntülərini yayıb.
Elchi.az xəbər verir ki, İran dövlət televiziyasının məlumatına görə, hava hücumundan müdafiə bölmələri İsfahan vilayətinin şərqində İsrailə məxsus PUA-nı vurub.
Hermes 900 tipi olaraq qeyd edilən İHA-nın üzərində 8 təkmil raketin olduğu bildirilib.
Digər tərəfdən, İsrail ordusu açıqlamasında İranda bir İHA-nın vurulduğunu təsdiqləyib. Ordudan verilən açıqlamada gecə saatlarında İsrailə məxsus pilotsuz təyyarənin İran hava məkanında yer-hava raketi ilə hədəfə alındığı bildirilib.
Açıqlamada vurulan pilotsuz təyyarənin İran sərhədləri daxilində düşdüyü və təyyarədən “məlumatın sızması riskinin olmadığı” iddia edilib.
İyunun 13-də İsrailin İrana hücumları başlayandan bəri İran mənbələri İsrailin dörd döyüş təyyarəsini, çoxlu İHA və SİHA-nı vurduqlarını açıqlayıb. Lakin vurulduğu deyilən təyyarələrin heç bir görüntüsü paylaşılmayıb.
Nuranə Məmmədova
