İran, Böyük Britaniya, Fransa və Almaniya nümayəndə heyətləri nüvə fəaliyyətləri ilə bağlı danışıqlar aparmaq üçün İranın İstanbuldakı Baş Konsulluğunda ikinci dəfə bir araya gəlib.
Elchi.az xəbər verir ki, nümayəndə heyətlərini daşıyan maşınlar İranın İstanbuldakı Baş Konsulluğuna daxil olub.
Danışıqlar bağlı qapılar arxasında keçirilir.
Xarici işlər nazirinin müavinləri səviyyəsində keçirilən danışıqlarda İranı xarici işlər nazirinin müavinləri Məcid Təxt-Rəvançi və Kazem Qəribabadi təmsil edirlər.
İran 2015-ci ildə imzalanmış nüvə sazişinin Avropa tərəflərinin tələbi ilə danışıqların yeni raundunun keçirilməsinə razılıq verib.
Razılaşmanın Avropa tərəfləri kimi tanınan İran və Böyük Britaniya, Fransa və Almaniyadan ibarət E3 qrupu mayın 16-da İstanbulda xarici işlər nazirinin müavinləri səviyyəsində görüşüb. Tərəflər ABŞ və İran arasında davam edən dolayı danışıqlara paralel olaraq təmasları davam etdirmək barədə razılığa gəliblər.
Şayəstə Hüseynova
