Əraqçi: İran müharibədən sonra Hörmüz boğazından gəmilərin keçidi qaydalarını yenidən nəzərdən keçirəcək
Elchi.az xəbər verir ki, İran ABŞ və İsraillə müharibədən sonra Hörmüz boğazından gəmilərin keçidi üçün yeni qaydalar hazırlamağı planlaşdırır. İranın xarici işlər naziri Abbas Əraqçi bunu Qətərin “Əl-Cəzirə” televiziya kanalına verdiyi müsahibədə açıqlayıb.
O, bunun İranın və bütün Yaxın Şərqin maraqlarını nəzərə alaraq, aydın qaydalara əsaslanaraq, bu sularda daimi əsasda təhlükəsiz naviqasiyanı təmin etmək üçün ediləcəyini bildirib.
Diplomat əlavə edib ki, Hörmüz boğazının hər iki tərəfindəki ölkələr – İran, Oman və Birləşmiş Ərəb Əmirlikləri – Hörmüz boğazında təhlükəsizliyin qarantı kimi çıxış etməlidirlər.
28 fevralda ABŞ İsraillə birlikdə İrana qarşı hərbi əməliyyata başlayıb. Cavab olaraq Tehran İsrailə, eləcə də Səudiyyə Ərəbistanı, Bəhreyn, Qətər, Küveyt və BƏƏ daxil olmaqla Yaxın Şərqdəki Amerika bazalarına raket və pilotsuz təyyarələrlə hücumlar həyata keçirib. Bundan əlavə, İranın dəniz yolu ilə neft daşınmalarının təxminən 30%-ni təşkil edən Hörmüz boğazını bağlaması və Fars körfəzi ölkələrində neft infrastrukturuna hücumlar barədə məlumatlar yayılmışdı. Bu, neft qiymətlərinin dörd ilin ən yüksək səviyyəsinə qalxmasına səbəb oldu.
Şayəstə
