“İnter”dən rüşvətə görə qovulan məşqçini “Neftçi”yə kim sırıyıb?

Tofiq Mustafayev adlı məşqçi Azərbaycanın futbol ictimaiyyətinə yaxşı tanışdı. Vaxtiylə “Xəzər Lənkəran”da Ağasəlim Mircavadovun köməkçisi kimi çalışan mütəxəssisin adı sonradan rüşvət qalmaqalında da hallanıb. “İnter”də çalışarkən azyaşlı uşaqların valideyinlərindən rüşvət tələb etməkdə ittiham olunan məşqçi, faktlar sübut olunduğuna görə “bankirlər”in düşərgəsindən qovulmuşdu.

Ancaq Tofiq Mustafayevin işsiz günləri çox çəkmədi. Onu AZAL-a dəvət etdilər. Bir müddətdən sonra isə Mustafayev AZAL-dan da ayrılmalı oldu. Yenə də futbol camiəsini Mustafayevin valideyinlərdən rüşvət tələb etməsiylə bağlı söz-söhbət bürüdü. Amma adı rüşvət qalmaqalında hallanan məşqçi növbəti dəfə özünə iş yeri tapdı. Bu dəfə “Neftçi”yə üz tutdu. Hazırda Tofiq Mustafayev “Neftçi”nin U-17-sinə başçılıq edir. Ölkənin ən köklü klubunun adı rüşvət qalmaqalında hallanan bir mütəxəssisi sıralarına qatması təəccüb doğurmaya bilməz. “Od olmayan yerdən tüstü çıxmaz” deyiblər. Bəs adı bu qədər mənfi yöndə hallanan bir məşqçi “Neftçi”yə necə yol tapıb? “Ağ-qaralar” klubun imicini, reputasiyasını kimin maraqlarına qurban verərək, Mustafayevlə işbirliyi qurub?

Komanda.az-ın əldə etdiyi məlumata görə, Tofiq Mustafayevin Azərbaycan futbolundakı himayəçisi Peşəkar Futbol Liqasının prezidenti Ramin Musayevdi. Mustafayev AZAL-a da PFL prezidentinin göstərişiylə göndərilibmiş. Ordan məşqçiyə yaraşmayan hərəkətlərinə görə qovulduqdan sonra “Neftçi”yə keçidi də Musayevin xeyir-duası ilə baş tutub.

Bu məsələdə maraqlı məqam odu ki, cəmiyyətdə “Neftçi”nin prezidenti Sadıq Sadıqovla PFL prezidentinin münasibətlərinin gərgin olduğu, hətta düşmənçilik səviyyəsinə qalxdığı xəbərləri yayılır. Görünür, bu tip xəbərlər sadəcə blefdi. Əslində, Sadıq Sadıqovla Ramin Musayev üzdə “düşmən”di. Amma arxada bu iki şəxs elə bir ələ “oynayır”. Hətta PFL prezidenti “Neftçi”nin kadr siyasətinə belə müdaxilə edir. Ya da Sadıq Sadıqov onun xahişlərini nəzərə alır. Bütün hallarda, ortada bir “oyun”un oynanıldığı faktdı. Bu “oyun”da isə qurban verilən “Neftçi”nin imici, maraqlarıdı. Sadıq Sadıqovla Ramin Musayevin maraqları başlayan yerdə bitən “Neftçi”nin imici, maraqları.(Komanda.az)