Avropa antisemitizmdə, media isə qərəzli olmaqda ittiham edildi
“The Times of İsrael” qəzetinin suallarını cavablandıran ABŞ-ın keçmiş dövlət katibi (2009-2013) Hillari Klinton İsrailin baş naziri Benyamin Netanyahunu müdafiə etdiyini bildirib. Hillari Klintonun ABŞ prezidentliyinə namizəd ola biləcəyini vurğulayan qəzet “islam ekstremizmi“ ifadəsini məqalə boyu dönə-dönə işlədib.
ABŞ-ın keçmiş dövlət katibi İsrailin Qəzzada həyata keçirdiyi hərbi əməliyyatları dəstəkləyib, baş verən münaqişəyə və gərginliyə görə bütün günahları “Həmas“in üzərinə qoyub. Uşaqların ölümünə görə də Həmasi ittiham edib, günahsız insanların qətlində də Həması suçlayıb. Onun dediyinə görə İsrail isə Həmasdan fərqli olaraq öz xalqını müdafiə edir və bölgədə sülhə nail olmağa can atır.
Hilları Kliton bildirib ki, indi ABŞ islam terrorizminə qarşı bir vaxtlar kommunizmə qarşı apardığı kimi, kəskin mübarizə aparmalıdır.
O, deyib ki, Suriyada Bəşər Əsədə qarşı üsyan qalxanda Obama administrasiyası üsyançılara dərhal kömək etmədi. Nəticədə cihadçılar Bəşər Əsədə qarşı mübarizədə irəli çıxdılar.
Xanım Hillari bildirib ki, Barak Obama xarici siyasətdə həddən artıq ehtiyatlı addımlar atır: “Böyük xalqlar böyük prinsiplərə söykənməlidir, axmaq hərəkətlər həyata keçirməməlidir“.
Xanım Klinton bildirib ki, İsraillə savaşda olan Həmasın aqressiv davranışları onu heyrətdə qoyub.
İsrailin Fələstinə endirdiyi zərbələrin qeyri-adekvat olması ilə bağlı suala da Hillari Klinton yəhudilərin belə həsəd aparacağı şəkildə cavab verib: “İsrail Qəzzadan atılan raket hücumlarına məruz qalmışdı. Həmasın atdığı addımlar, tunellərin qazılması, raketlərin yaradılması başa düşülən deyil. Həm də onlar bu kimi fəaliyyətlə mülkü adamların yaşadığı yerlərdə məşğul olurlar. Əlbəttə, İsrail, ABŞ və ya istənilən demokratik ölkə kimi mülki şəxslər arasında itkiləri minimuma endirməyə çalışmalıdır“.
ABŞ-ın keçmiş dövlət katibi bir az da irəli gedib. Sanki Qəzzada qətl edilənlərin sayının 2 min nəfəri ötməsindən xəbərsiz kimi görünərək deyib: “İndi biz İsrailə qarşı beynəlxalq səviyyədə mənfi reaksiyanı aydın görürük. Bu reaksiya yersizdir və ədalətli deyil. Və İsrail mülki şəxslər arasında itkilərin minimum olmasına çalışır“.
“ Düşünürəm ki, İsrail etməli olduğu işi görüb. Raket hücumuna məruz qalan vətəndaşların və ərazisini qoruyub. Bu isə sadə hərbi əməliyyat deyil, ona görə də çətinliklər var. Xüsusən Həmasın inşa etdiyi tunellər problem yaradır. Əgər Həmas öz mülkü vətəndaşlarının qayğısına qalsaydı hava hücumundan qorunmaq üçün bunkerlər tikərdi, onlarsa İsrailə hücum etmək üçün tunellər salıblar“.
Onun fikrincə, dünyada antisemitizmin güclənməsi fonunda beynəlxalq ictimaiyyətin İsrailə münasibəti daha çox qərəzli oldu…
Xanım Klinton Avropada İsrail əleyhinə olan mitinqlərə də etirazını bildirib. O, bunu da Avropada hələ də antisemitizmin dəbdə olması ilə izah etməyə çalışıb. Media da bu iddialı xanımın qəzəbinə gəlib: ”Dünya mediası münaqişəni qərəzli və birtərəfli işıqlandırır…Bir qayda olaraq Həmasın dünyaya göstərmək istədiklərinə Qərb jurnalistlərinin girişi olur. Və tamaşaçılar həmin məqamları televiziyalarda izləyirlər. Bu təbliğatın köhnə variantıdır, İsrail isə bu cür təbliğatdan istifadə edə bilmir”…
“Bəli, bu doğrudur ki, İsrailə qarşı antisemitizmdən irəli gələn mənfi münasibət var. İsrail güclü dövlətdir, həqiqətən də güclü silahlanıb. Həmas isə özünü fələstinlilərin müdafiəçisi kimi təqdim edir. Nümayiş etdirir ki, suveren dövlət qurmaq uğrunda savaşır. Əlbəttə, bunlar təbliğatdır. Məqsədsə odur ki, Fələstini müstəqil dövlət kimi tanısınlar …”
Elbəyi Həsənli (Sürix)
P.S Hillari Klinton qəzetə onu da bildirib ki, İranın nüvə texnologiyası üçün uranın zəginləşdirilməsinə yönəlmiş cəhdlərinin qarşısının alınması tərəfdarıdr.
Son şərhlər