Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.
Bu barədə Elchi.az-a FHN-in mətbuat xidmətindən məlumat verilib.
Bildirilib ki, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin də iştirakı ilə Bakı Regional Mərkəzi (RM) tərəfindən Yasamal rayonu Bakı Baş Səhiyyə Mərkəzində, Aran RM tərəfindən Yevlax şəhər İcra Hakimiyyəti başçısının Nemətabad kənd İnzibati ərazi dairəsi üzrə nümayəndəliyində və Yevlax rayonu Aran qəsəbə 2 nömrəli tam orta məktəbində, Gəncə RM tərəfindən Göygöl Şərab Zavodu ASC-də, Qarabağ RM tərəfindən Tərtər şəhər 5 nömrəli körpələr evi-uşaq baxçasında, Muğan RM tərəfindən Şirvan şəhər Onkoloji Xəstəxanasında, Şimal-qərb RM tərəfindən Qobustan rayonu Mədəniyyət Mərkəzində və Zaqatala rayonu Mazıx kənd tam orta məktəbində maarifləndirmə tədbirləri keçirilib.
Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.
Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğın və zəlzələ ilə bağlı zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.
İnteraktiv formada keçirilən tədbirlər zamanı suallar ətraflı cavablandırılıb.
