Filippində Mayon vulkanının davam edən aktivliyi nəticəsində baş verən kül yağışı azı 32 yaşayış məntəqəsinə ziyan vurub.
Elchi.az xəbər verir ki, bu barədə ölkənin vulkanologiya və seysmologiya institutuna istinadən “ABS-CBN News” telekanalı məlumat yayıb.
Məlumata görə, bir neçə yaşayış məntəqəsində piroklastik axınlar (qızmış qaz, kül və daş qarışıqları) müşahidə olunur. Mütəxəssislər kükürd dioksidinin səviyyəsinin artdığını qeydə alıblar ki, bu da vulkanın altında magmanın hərəkət etdiyini göstərir. Bundan əlavə, fevralın əvvəlindən bəri təxminən 470 daş uçqunu hadisəsi qeydə alınıb.
Hündürlüyü təxminən 2,5 min metr olan Mayon vulkanı respublikanın ən böyük adası Luzonda yerləşir və konusvari forması ilə məşhur turistik məkandır. O, Filippində ən aktiv vulkan hesab olunur. Ən fəlakətli püskürmə 1814-cü ildə baş verib — nəticədə təxminən 1,2 min nəfər həlak olub, bir şəhər isə lava altında qalıb.
Məryəm
