Fövqəladə Hallar Nazirliyinin Sumqayıt Regional Mərkəzi Kiçikhəcmli Gəmilərə Nəzarət və Sularda Xilasetmə Dövlət Xidməti ilə birgə Mərkəzin inzibati binasında “Su hövzələrində təhlükəsizliyin təmin olunması” mövzusunda müşavirə keçirib.
Bu barədə Elchi.az-a Fövqəladə Hallar Nazirliyinin Mətbuat xidmətindən məlumat verilib.
Müşavirədə Sumqayıt Şəhər İcra Hakimiyyəti və inzibati ərazi dairəsi üzrə nümayəndəliklərin, Sumqayıt Şəhər Polis İdarəsinin, Sumqayıt şəhər Gigiyena və Epidemiologiya Mərkəzinin, bələdiyyələrin, digər aidiyyəti qurumların məsul şəxsləri və sahilboyu iaşə obyektlərinin nümayəndələri iştirak edib.
Tədbirdə şəhər ərazisindəki su hövzələrində keçirilən monitorinqlərin nəticələri barədə məlumat verilib, aşkar olunmuş nöqsanların aradan qaldırılması yolları geniş müzakirə edilib.
Müşavirədə çıxış edənlər, həmçinin yay mövsümündə çimərliklərdə vətəndaşların təhlükəsizliyinin təmin olunması qaydaları, maarifləndirmə işinin vəziyyəti, ölkə ərazisindəki su hövzələrində həyata keçirilmiş aidiyyəti təhlükəsizlik tədbirləri ilə bağlı məlumatlar veriblər.
