Belçikanın paytaxtı Brüsseldə minlərlə fermer Avropa İttifaqı (Aİ) Liderləri Zirvəsi zamanı Cənub Ortaq Bazarı (MERCOSUR) ilə planlaşdırılan azad ticarət müqaviləsinə və Birliyin gələcək büdcəsində kənd təsərrüfatı subsidiyalarının azaldılmasına qarşı nümayiş keçirib.
Elchi.az xəbər verir ki, Aİ ölkələrindəki müxtəlif kənd təsərrüfatı və heyvandarlıq assosiasiyalarının çağırışına cavab olaraq, minlərlə fermer Avropa Parlamentinin (AP) qarşısındakı Lüksemburq Meydanında toplaşıb.
Fermerlər yüzlərlə traktoru Avropa Komissiyası və Avropa Şurası binalarının yaxınlığından keçən Rue de la Loi küçəsində, eləcə də Avropa Parlamentinin ətrafındakı yan küçələrdə park edərək nəqliyyatın hərəkətini dayandırıblar. Lüksemburq Meydanında fermerlər Avropa Parlamentinin binasına kartof və yumurta ataraq sərt polis reaksiyası ilə üzləşiblər.
Fermerlər, həmçinin 27 Aİ üzvü dövlətin liderlərinin sammitinin keçirildiyi binanın yaxınlığında polis barrikadası ilə qarşılaşıblar. Bəzi fermerlərin Aİ binalarının ətrafındakı baryerlərə doğru atəşfəşanlıq atmalarına cavab olaraq polis gözyaşardıcı qaz və su şırnaqlarından istifadə edib.
Bəzi traktorlar üzərində “Fermerlərə yox, yeməklərə yox”, “MERCOSUR-u dayandırın” və “Brüsselə az, daha çox azadlıq” yazılı bannerlər asılıb. Fermerlər Aİ-nin gələcək büdcəsində kənd təsərrüfatı subsidiyalarının azaldılmamasını, MERCOSUR (üzvləri arasında Argentina, Braziliya, Paraqvay və Uruqvay da var) ilə planlaşdırılan ticarət müqaviləsinin imzalanmamasını və bürokratik prosedurların sadələşdirilməsini tələb ediblər.
Etirazlar və Aİ Liderlərinin Zirvə Toplantısı Brüsselin əsas yollarında nəqliyyatın hərəkətini dayandırıb, şəhər daxilində ictimai nəqliyyatda ciddi problemlər yaranıb.
Məryəm
