Xalq hərəkatının liderlərindən biri və müstəqil Azərbaycanın ikinci prezidenti Əbülfəz Elçibəyin vəfatının 14-cü 
ildönümündə onun ən yaxın silahdaşlarından biri deputat Fazil Mustafa Ölkə.az müxbirinin suallarını cavablandırıb.
– Fazil bəy, Elçibəyin ölümünün14-cu il dönümü haqda nə deyə bilərsiz?
– Əbilfəz Elçibəy Azərbaycan tarixində özünə məxsus yer tutan bir şəxsiyyətdir. O, həm ideya baxmından, həm hərəkat baxımından Azərbaycan tarixinə öz damğasını vurmuş, yeni nəslin yetişməsində müstəsna rolu olmuş tarixi bir şəxsiyyətdir. Ona görə də onun xatirəsi həmişə diqqətdə saxlanmalıdır. O, hakimiyyətdə olduğu müddətdə apardığı islahatlarla yadda qalan şəxsiyyətdir. Hər kəs onun bu gündə vəfatını qədirşünaslıq anlayışı ilə qeyd edir və onu ziyarət edir.
– Elçibəyin rəhbərlik etdiyi hərakat sonradan xırda partiyalara parçalandı. Sizcə bunlardan hansı bəyin idealarına daha sadiq qaldı?
– Elçibyin ideyasını ayrıca qeyd etmək düzgün deyil. Bu ümumazərbaycan ideyası idi. Ideyalara sadiqliyin olub olmaması əslində siyasi politologiyanın predmeti kimi qəbul edilir. İdeya özü əgər realdırsa, həyata keçməsi mümkündürsə o yaşayacaqdır. Necə ki, Azərbaycanın müstəqillik ideyası Məmməd Əmin Rəsulzadədən dövründən başlayaraq yaşadı. Digər ideyalar var ki, “Bütöv Azərbaycan”, “Türk Birliyi” və başqaları çox zaman reallaşması mümkün olmayan məsələlərdir. Bu gün kiminsə o ideyalara qarşı fərqli fikir söyləməsi o ideyalara qarşı çıxma anlamına gəlməməlidir. Hamını düşündürən bir məqam var o da Azərbaycandır. Bu gün nə varsa onun önə çəkilməsi vacibdir. O ideyalar qalıcıdır ki, onları cəmiyyət yaşadır. Qalıcı deyilsə bir dövr üçün səslənib və o əbədi yaşamalıdır kimi qayda yoxdur.
– Elçibəyin ölümü ətrafında cürbəcür söz-söhbtlər gəzir. Hətta onun öldürüldüyünü iddia edənlər də oldu. Buna münasibətniz?
– Əbilfəz Elçibəyin öldürülməsi məsələsi yalandır. Elçibəy öz əcəli ilə dünyasını dəyişib. Onun haqqında deyilənlərin hamısı çirkin, onun şəxsiyyətinə uyğun gəlməyən yanaşmalardır. Bunu qəbul etmək doğru deyil.
– Elçibəy sağ olsa idi indi Azərbaycan siyasəti necə görsənərdi?
– Tale şəxs formasında heç vaxt işləmir. Əbilfəz bəy elə orda da tamamlanmalı idi, yekunlaşmalı idi. Güman etmirəm ki, Əbilfəz bəy sağ olsa idi bir möcüzəli çubuqla nəyisə dəyişərdi. Çünki Əbülfəz bəyin də işləmə obyekti Azərbaycan idi. Azərbaycan cəmiyyəti o dəyərləri qiymətləndirə bilmədisə, onu yaşada bilmədisə, Əbilfəz Elçibəyin humanizminə, dürüstlüyünə bağlı bir prisipləri başqa bir prinsiplərdən üstün tutdusa, bəy yaşasa idi də, heç bir şey dəyişməyəcəydi. Elçibəy, hakimiyyətdən sonra da yaşadı, mübarizə apardı, ancaq cəmiyyətimizin aurasını, düşüncə tərzini dəyişə bilmədi. Bunun da səbələri fərqlidir. Azərbaycan cəmiyyəti yanılış tarix və din şüuruna malikdir. Bunu dəyişmək üçün çox böyük mücadilələr verilməlidir. Yeni bir sağlam nəslin yetişməsini gözləmək lazımdır…
Son şərhlər