Ərzurumda “Aşıq sənəti: Türk dünyasının ortaq ədəbi xəzinəsi” mövzusunda Beynəlxalq Elmi Konfrans və konsert proqramı keçirilib.
Bu barədə Elchi.az-a Türkiyədə fəaliyyət göstərən Azərbaycan Mədəniyyət Mərkəzindən məlumat verilib.
Bildirilib ki, Ərzurumda Türkiyənin nüfuzlu “Mədəniyyət Yolu” Festivalı çərçivəsində Dövlət Teatrında keçirilən “Aşıq sənəti: Türk dünyasının ortaq ədəbi xəzinəsi” mövzusunda konfrans və konsert proqramı Türkiyə Respublikasının Mədəniyyət və Turizm Nazirliyi ilə Azərbaycan Respublikasının Mədəniyyət Nazirliyinin birgə layihəsi, Azərbaycan Respublikasının Türkiyədəki Səfirliyinin nəzdində fəaliyyət göstərən Azərbaycan Mədəniyyət Mərkəzinin dəstəyi ilə təşkil olunub.
Tədbirdə şəhər hakimiyyətinin, Azərbaycan Mədəniyyət Mərkəzi, Kars şəhərindəki Baş konsulluğumuzun təmsilçiləri, ictimaiyyət, mədəniyyət nümayəndələri, sənətsevərlər iştirak ediblər.
Giriş sözü ilə çıxış edən Ərzurum şəhər Mədəniyyət və Turizm Müdiri Ahmet Yer və Türkiyədəki Azərbaycan Mədəniyyət Mərkəzinin direktoru Samir Abbasov, tədbirin əsas məqsədinin Azərbaycan və Türkiyədə geniş yayılmış, eyni zamanda Türk dünyasının müxtəlif bölgələrini əhatə edən aşıq sənətinin zəngin irsini tanıtmaq və yaşatmaq olduğunu qeyd ediblər. Onlar, əsrlər boyu inkişaf edən aşıq sənətinin musiqi, poeziya, dastan və teatr ənənələrini özündə birləşdirərək Türk dünyasının ortaq mədəni yaddaşını əks etdirən mühüm mədəni irs nümunəsi olduğunu vurğulayıb, Türkiyə aşıq məktəbinin nümayəndələrindən Şərqi Anadolu, Azərbaycan aşıq məktəbinin nümayəndələrindən isə Qərbi Azərbaycan aşıqlarının bu zəngin ənənənin formalaşmasında və nəsildən-nəslə ötürülməsində mühüm rol oynadığını qeyd ediblər.
Daha sonra konfransda Azərbaycan Aşıqlar Birliyinin sədr müavini, Azərbaycan Dövlət Mədəniyyət və İncəsənət Universitetinin Aşıq sənəti kafedrasının dosentləri, aşıq ifaçıları Altay Məmmədov və Hafiz Kərimov, Türkiyənin Ərzincan Binali Yıldırım Universitetinin Ədəbiyyat fakültəsi Türk Dili və Ədəbiyyatı bölməsinin professoru Ali Kafkasyalı, Ərzurum Atatürk Universitetinin Ədəbiyyat fakültəsinin professoru Nimet Yıldırım çıxış ediblər. Çıxışlarda Azərbaycan aşıq məktəblərinin zənginliyinə nəzər salınaraq, hər bir bölgənin özünəməxsus ifa üslubu, musiqi və poetik ənənəsi ilə bu böyük sənət xəzinəsinə verdiyi töhfənin Türk dünyasının ortaq mədəni yaddaşının formalaşmasında mühüm rol oynadığı vurğulanıb. Azərbaycan və Türkiyədə aşıq sənətinin yüzillər boyunca xalqın mənəvi dünyasını, milli duyğularını, qəhrəmanlıq dastanlarını və həyat fəlsəfəsini sazın və sözün dili ilə nəsildən-nəslə ötürərək bu günədək yaşatdığı qeyd olunub.
Çıxışlarda aşıq sənətinin tarixi inkişafı, Türk dünyasının ortaq ədəbi və mədəni yaddaşındakı yeri, saz-söz ənənəsinin xalqlar arasında mədəni əlaqələrin möhkəmləndirilməsindəki rolu və bu qədim irsin gələcək nəsillərə ötürülməsinin əhəmiyyəti məruzə olunub.
Konfransdan sonra keçirilən konsert proqramında isə Azərbaycan və Türkiyədən olan aşıqlar eyni səhnədə çıxış ediblər. Sənətçilər saz və söz ənənəsinin seçilmiş nümunələrini Ərzurumun sənətsevərləri üçün təqdim edərək Türk dünyasının ortaq mədəni dəyərlərini sənətin dili ilə nümayiş etdiriblər.
Azərbaycan aşıqları – Aşıq Əli Quliyev, Altay Məmmədov, Hafiz Kərimov, Türk Halk Ozanları İhsan Yavuzer, Rahim Sağlam müxtəlif aşıq musiqilərini ifa ediblər.
Çıxışlar tamaşaçılar tərəfindən maraq və alqışlarla qarşılanıb.
