Döyüşdə iştirak etmiş erməni əsgərlərin valideynləri övladlarının sonrakı taleyindən hələ də xəbərsizdir.

Axar.az xəbər verir ki, bu barədə məlumatı Regional Sabitlik və Təhlükəsizlik Mərkəzi əldə edib.

Mərkəz Ermənistan mətbuatında və sosial şəbəkələrdə yayılan xəbərlərə istinadən bildirir ki, Dağlıq Qarabağ ərazisinə girişin qadağan olunduğunu bildirən erməni valideynlər Ermənistan rəhbərliyini baş verən hadisələrin nəticələrini xalqdan gizlətməkdə günahlandırırlar.

Yazılan şərhlərdə itkin kimi göstərilmiş hərbçilərin, əslində, Əsgəranda bu kimi hadisələr üçün hazırlanmış xüsusi soyuducuda saxlandığı bildirilir.

“İtkin” əsgərlərdən birinin qohumu bir neçə gün əvvəl pul qarşılığında yaxınlarını götürmək üçün orada olarkən morqun meyitlə dolu olduğunu müşahidə edib.

Həmçinin şərhlərdə ermənilərin 1000-ə qədər itki verdiyi, Qarabağ ərazisindən həlak olanlar barədə heç bir xəbər verilmədiyi halda Ermənistan və Qarabağ separatçılarının Əsgəran və Xankəndində əyləncəli konsertlər təşkil edərək ölənlərə və yaxınlarına bu şəkildə “ehtiram” göstərdiklərini bildirirlər.

Qeyd edək ki, aprelin 5-dən etibarən atəşkəs elan olunmasına və Azərbaycan tərəfinin buna riayət etməsinə baxmayaraq, Ermənistan rəhbərliyi gizlətdiyi meyitləri Kəlbəcər, Laçın, Cəbrayıl istiqamətindən hissə-hissə üzə çıxararaq bu üsulla xalqın qəzəbindən qurtulmağa çalışır.