Bir neçə gündür ki, ABŞ-ın Azərbaycana sanksiya tətbiq edəcəyi barədə məlumatlar yayılmaqdadır.

Ölkə.az-a danışan hərbi ekspert İbrahim Rüstəmlinin fikrincə, qərb ölkələrinin Azərbaycana qarşı sanksiya tətbiq olunması barədə çağırışları Silahlı Qüvvələrimizin inkişaf dinamikasına qətiyyən təsir göstərməyəcək”.

“Əvvəla, bəzi qərb ölkələrinin Azərbaycana qarşı sanksiya tətbiq olunması barədə çağırışlarını hüquqi baxımdan əsassız sayıram və bu çağırışları təzyiq forması kimi dəyərləndirirəm. Ən azı ona görə ki, Azərbaycan ABŞ-ın və Avropanın marağında olan Cənubi Qaz Dəhlizi kimi möhtəşəm bir layihə həyata keçirməyi planlaşdırır və müvafiq istiqamətdə ciddi addımlar atır. 45 milyard dollardan artıq sərmayə qoyulacaq bu layihədən imtina etmək real görünmür.
İkincisi, bir sıra qərb və Avropa dövlətlərindən fərqli olaraq, Azərbaycan öz siyasi, iqtisadi iradəsini ifadə etməyi, verdiyi sözün üstündə axıradək durmağı bacaran bir ölkədir. İstər regional, istərsə də beynəlxalq miqyasda yürüdülən balanslaşdırılış dövlət siyasəti Azərbaycanın siyasi və iqtisadi təhlükəsizliyinin ən etibarlı qarantıdır.

Bu, həm də hərb sahəsinə aiddir. Azərbaycan Silahlı Qüvvələrində aparılan islahatlar, gerçəkləşdirilən quruculuq işləri bir sıra mühüm direktiv sənədlərə əsaslanır. Bu sənədlərin nüvəsini, heç şübhəsiz, 2010-cu il iyunun 8-də Milli Məclisdə qəbul olunmuş “Azərbaycan Respublikasının hərbi doktrinası” təşkil edir.
Düzdür, ordu quruculuğu sahəsində beynəlxalq əməkdaşlığın rolu və əhəmiyyəti böyükdür, amma bununla yanaşı, Azərbaycan bütün sahələrdə olduğu kimi, hərb sahəsində də öz asılılığını son illər minimuma endirib. Azərbaycan Prezidentinin 16 dekabr 2005-ci il tarixli sərəncamı ilə yaradılan Müdafiə Sənayesi Nazirliyi də məhz bu məqsədə xidmət edir.

Əlbəttə, imzalanmış hər hansı hərbi memorandum, saziş və müqavilələri pozmaqda maraqlı deyilik, ancaq bu, hansısa Avropa, yaxud qərb dövləti olmasa, Azərbaycan Silahlı Qüvvələri inkişafdan qalacaq kimi əsassız iddialara da yol açmamalıdır. Ölkəmizdə ordu quruculuğu işi şəxsən Silahlı Qüvvələrin Ali Baş Komandanının, müvafiq aparat rəhbərliyinin və yerlərdəki rəsmilərin, o cümlədən, müdafiə nazirinin ciddi nəzarəti altında aparılır. Ona görə də narahat olmağa heç bir əsas görmürəm. Yəni, bəzi qərb ölkələrinin Azərbaycana qarşı sanksiya tətbiq olunması barədə çağırışları Silahlı Qüvvələrimizin inkişaf dinamikasına qətiyyən təsir göstərməyəcək”.

Qeyd edək ki, Azərbaycan Prezident Administrasiyası rəhbərinin müavini, Xarici əlaqələr şöbəsinin müdiri Novruz Məmmədov Qərbdəki bəzi dairələrin Azərbaycana qarşı sanksiya tətbiq olunması barədə çağırışlarına münasibətində bu sözlərin deyilməsini ancaq Azərbaycana təzyiq etmək kimi şərh edib.