Öldürücü xəstəlik Türkiyəyə kimi gəlib çatdı
Ebola virusu Azərbaycanın bir addımlığına qədər gəlib çatıb. Ötən gün Türkiyədə bu virusun daşıyıcısı olan bir nəfər hava limanında saxlanılıb. İstanbuldakı Atatürk Hava Limanında turistlərdən birində Ebola virusu aşkar edilib. Bu barədə ötən gün Türkiyə mətbuatı həyəcan təbili çalıb. Xəstənin Nigeriya vətəndaşı olduğu bildirilir.
Bunun ardından hava yolu ilə Nigeriyadan Türkiyəyə gələn bütün sərnişinlər tibb müəssisələrinə çatdırılıblar.
Xatırladaq ki, Afrikanın qərbində yayılan Ebola virusundan indiyədək yüzlərlə insan dünyasını dəyişib. Tər, qan, tüpürcək yolu ilə yayılan bu virusa yoluxanların müalicəsi mümkünsüzdür. Xəstəliyin simptomları qızdırma, baş ağrısı, qusma, ishal və qanaxmadır.
Ebola qurbanları ilə bağlı statistika təhlükəli həddə çatıb. Qərbi Avropada Ebola virusundan ölənlərin sayı 1013 nəfər çatıb. Son məlumatlara görə, bu ölümcül virusa yoluxanların sayı iki min nəfərə yaxındır.
Azərbaycanın Səhiyyə Nazirliyi isə məlumat yayıb ki, heç bir ölkənin, o cümlədən Azərbaycan vətəndaşlarının Ebola virusuna yoluxmadan sığortalanmayıb. Mediaya açıqlama verən Səhiyyə Nazirliyinin sanitar-epidemioloji nəzarət sektorunun müdiri Viktor Qasımov bildirib ki, hələlik Ümumdünya Səhiyyə Təşkilatı sərhədləri bağlamayıb, bu barədə qərar yoxdur: “Hər halda Azərbaycan bütün hazırlıq işlərini görüb. Bununla bağlı şübhəli hal olarsa, müvafiq tədbirlər görüləcək”.
Ancaq Ebola virusunun Azərbaycana gəlməsi üçün yetərincə, “açıq qapılar” var. Azərbaycanda təhsil alan afrikalı tələbələr sentyabrın əvvəllərində ölkəmizə axın edəcəklər.
Artıq bir çox ölkələr bu cür önləyici tədbirlər görməyə başlayıb. Belə ki, Səudiyyə Ərəbistanının Səhiyyə Nazirliyi bu il baş tutacaq Kəbə və həcc ziyarətinə 3 ölkədən gələn müsəlmanlara qadağa qoyub. Afrika ölkələri Liviya, Qvineya və Sierra-Leone ölkələrində yayılan Ebola virusunun gətirə biləcəyi təhlükəni qabaqlamaq üçün həmin ölkələrdən gələn zəvvarların Səudiyyə Ərəbistanına girişi əngəllənib. Bundan əlavə, Səudiyyə Ərəbistanı hökuməti gömrük məntəqələrində, eləcə də hava limanlarında çalışan əməkdaşlarına virus haqqında təlimlər keçirir.
Ölkəmizdə isə hələ ki Səhiyyə Nazirliyindən heç bir aidiyyəti quruma bu cür tövsiyələr verilməyib.
Nərgiz LİFTİYEVA
Son şərhlər