“İran heç bir separatçı qrupun silaha sahib olmasına və İslam Respublikasına qarşı üsyan qaldırmasına icazə verməyəcək”.
Elchi.az Reuters.com-a istinadən xəbər verir ki, bu sözləri İran prezidenti İbrahim Rəisi 1980-1988-ci illərdə İraqla müharibənin ildönümünə həsr olunmuş hərbi paradda deyib.
Rəisi İranın müdafiə nailiyyətlərini və silah istehsal imkanlarını yüksək qiymətləndirərək deyib ki, bu, ölkənin silahlı qüvvələrinin sanksiyaları necə inkişaf fürsətinə çevirdiyini göstərir. İran prezidenti həmçinin bəyan edib ki, İran başqa ölkələrlə müharibə etmək niyyətində deyil: “Bu gün İranın hərbi doktrinasında müharibə və hökmranlığın yeri yoxdur, lakin davamlı təhlükəsizlik və çəkindirmə üçün müdafiə yanaşması aydın siyasətdir”,-deyə Rəisi bildirib.
İran prezidenti qeyd edib ki, region ölkələri xarici qüvvələrin bölgədə, xüsusən də Fars körfəzində mövcudluğuna son qoymaq üçün birgə çalışmalıdırlar. Onun sözlərinə görə, xarici silahlı qüvvələrin mövcudluğu regional problemlərin həlli deyil, onların mənbəyidir.
Yeganə
Son şərhlər