Bu gün uşaqların qarşılaşdıqları təhlükələr yalnız küçə və məişətdə qarşılaşdıqları ilə məhdudlaşmır, virtual məkanda da təhlükələrlə üzləşirlər.
Elchi.az xəbər verir ki, bunu Daxili işlər nazirinin müavini İsmət Əliyev Ailə, Qadın və Uşaq Problemləri üzrə Dövlət Komitəsi tərəfindən hazırlanmış “Uşaqlar və hüquq” kitabının və “Uşaqların hüquq düşüncəsi” tədqiqat işinin təqdimatında deyib.
O bildirib ki, buna görə aidiyyəti qurumlarla profilaktik tədbirlər həyata keçirilir.
“Uşaq yalnız ailənin deyil, dövlətin və cəmiyyətin gələcəyidir. Uşaqların hüquqlarının müdafiəsi dövlət siyasətinin prioritet istiqamətlərindəndir”, – nazir müavini vurğulayıb.
Onun sözlərinə görə, müasir dövrdə uşaqlara qarşı fiziki, psixoloji və məişət zorakılığı, baxımsızlıq, erkən nikah, kiberməkanda və digər yerlərdə təhlükəli amillər özünü büruzə verməkdədir: “Bu baxımdan risk altında olan uşaqların müəyyən edilməsi, hüquqlarının bərpası və aidiyyəti dövlət qurumları ilə birgə müdafiəsinin təşkili istiqamətində tərəfimizdən davamlı iş aparılır”.
