ABŞ Prezidenti Donald Trampın Qrenlandiyanı nəzarətə götürmək tələbləri və sonrakı tarif təhdidləri Danimarkada və digər Skandinaviya ölkələrində böyük etiraz dalğasına səbəb olub.
Elchi.az xəbər verir ki, bu etirazın konkret təzahürü olaraq, Amerika məhsullarını müəyyən etməyə və boykot etməyə kömək edən “NonUSA” (UdenUSA) mobil tətbiqi Danimarka tətbiq mağazalarında bir nömrəli yerə yüksəlib.
Boykot tətbiqlərinə yüksək maraq
“Gündəlik həyatda Amerika məhsullarını müəyyən etməyə və onlardan çəkinməyə kömək edir” şüarı ilə seçilən NonUSA tətbiqi istifadəçilərə istehsal yeri və mülkiyyət məlumatlarını görmək üçün məhsul barkodlarını skan etməyə imkan verir.
Tətbiq həmçinin Danimarka yerli bazarından ABŞ istehsalı olan məhsullara alternativlər təklif edir.
Məlumatlara görə, 9 yanvarda 441-ci yerdə olan tətbiq gərginliyin artması ilə ChatGPT kimi məşhur tətbiqləri geridə qoyaraq tez bir zamanda yüksəlib. Oxşar funksiyaya malik “Made O’Meter” tətbiqi də Danimarka, Norveç, İsveç və İslandiyada ən çox yüklənən 10 tətbiq arasında yer alıb.
Şayəstə
