Tehran rəsmi Bakıdan ölçü götürülməsini tələb edir; Sabir Rüstəmxanlı: “Belə əsəbləri də çox görmüşük, belə
səfirləri də…”
Xəbər verdiyimiz kimi, sentyabrın 8-də Dünya Azərbaycanlıları Konqresi “Yaxın Şərqdə baş verən problemlər: Güney Azərbaycandakı son durum” mövzusunda Bakıda dəyirmi masa keçirib. Ancaq dəyirmi masa İranın Azərbaycandakı səfirliyinin sərt etirazına səbəb olub.
İranın Azərbaycan səfirliyi DAK-ın sözügedən tədbir ilə bağlı etiraz bəyanatı yayıb. Səfirlik DAK-ın İranda yaşayan azərbaycanlıların durumu ilə bağlı keçirdiyi tədbiri “separatçılıq” adlandırıb. Bundan əlavə, səfirlik DAK-ı xalqa söykənməyən, siyasi yeri olmayan, dövlət himayəsindən məhrum “kiçik dəstə” hesab edir.
Səfirlik bəyan edib ki, qurum İranda yaşayan azərbaycanlılarla bağlı tədbirləri gündəmdə qalmaq üçün keçirir. Bəyanatda DAK “İran və Azərbaycan xalqları”nın düşmənlərinə xidmət etməkdə, sionizm mediası ilə birgə indiki əlaqələri zəiflətməkdə ittiham olunur.
Eyni zamanda səfirlik bəyanatda İranda Azərbaycan əleyhinə belə toplantılara yol verilmədiyini xatırladaraq rəsmi Bakının İranın ərazi bütövlüyünü sual altına alan bu kiçik separatçı dəstə barəsində qanun çərçivəsində davranmaq kimi tələb irəli sürür.
DAK həmsədri, Milli Məclisin deputatı Sabir Rüstəmxanlı “Turan” agentliyinə açıqlamasında İran səfirliyinin belə bir bəyanatla çıxış etmək haqqı olmadığını deyib. Bu sənədi insan haqlarını pozmaq kimi dəyərləndirib. DAK-ın ictimai qurum olduğunu deyən S.Rüstəmxanlı Güney Azərbaycan türklərinin insani haqları barədə danışmağı qurumun birbaşa vəzifəsi adlandırıb. Eyni zamanda İran tərəfin, bəzi beynəlxalq qurumların İranda Güney Azərbaycan türklərinin sayının reallıqda olduğundan az göstərilməsinə diqqət çəkib.
Daxili işlərə qarışmağa gəlincə, S.Rüstəmxanlı İranın “Səhər” telekanalını Azərbaycanın dövlət müstəqilliyini, dövlət atributlarını daim təhqirə məruz qoymaqda ittiham edib: “Hətta Azərbaycanı dövlət olaraq öz adı ilə deyil, başqa adlarla adlandırmağa cəsarət edir. İran Azərbaycanla ”qardaş dövlət” olduğunu deyir. Bu, necə qardaşlıqdır ki, millətin dilini əlindən alırlar. Özünü dini dövlət sayan İran tərəf bilir ki, dili verən Allahdır. Allahın verdiyini isə insanın əlindən almaq Allaha qarşı üsyandır. Özünü Azərbaycana dost sayan İran Ermənistanla əməkdaşlıq edir. Urmu gölü qurudulur, İŞİD-dən Güney Azərbaycan torpaqlarını tutacağı hədə-qorxusu gəlir, İran tərəf isə buna hər hansı mövqe ifadə etmir.
Odur ki, İran tərəfin belə bəyanatla çıxış etməyə, səfirin əsəb nümayiş etdirməsinə əsası yoxdur. Belə əsəbləri də çox görmüşük, belə səfirləri də, hər kəs öz işi ilə məşğul olsun və başqasının nə edəcəyi ilə bağlı hökm verməsin”.
Qeyd edək ki, Sabir Rüstəmxanlının fikirlərinə İran səfirliyindən cavab almağa çalışdıq. Ancaq səfirlikdən bildirdilər ki, hazırda İrandan Azərbaycana nümayəndə heyətinin səfəri olduğu üçün səfir DAK sədrinin iddialarına cavab verə bilmir. Ancaq eyni zamanda bildirdilər ki, yaxın günlərdə İran səfiri Möhsün Pakayin S.Rüstəmxanlının fikirləri ilə bağlı geniş açıqlama yayacaq.
Qeyd edək ki, İran hökuməti bir neçə dəfə Güney Azərbaycanla bağlı keçirilən tədbirlərə kəskin etirazını bildirib. Rəsmi Tehran bu cür fəaliyyətləri “separatçılıq” adlandırır və belə tədbirlərlə bağlı kəskin, hədələyici tonda bəyanatlar verir.
Son şərhlər