ABŞ Prezidenti Donald Tramp və Çin Prezidenti Si Cinpin arasında Pekində görüş başlayıb. Xinhua agentliyinin məlumatına görə, Si görüşün əvvəlində Prezident Trampla hər iki ölkəni və dünyanı narahat edən məsələləri müzakirə etmək və münasibətləri düzgün istiqamətə yönəltməklə gələcək üçün yeni bir fəsil açmaq istədiklərini bildirib.
Elchi.az xəbər verir ki, bu gün qlobal səviyyədə misli görünməmiş transformasiyaların sürətləndiyini, beynəlxalq vəziyyətin dəyişkən və gərgin olduğunu və dünyanın yeni tarixi yol ayrıcında olduğunu qeyd edən Si bildirib ki, “Çin və ABŞ dövrün problemlərinə birlikdə cavab verməlidirlər”.
Çin və ABŞ-ın fikir ayrılıqlarından daha çox ortaq maraqlarının olduğunu və bir ölkənin uğurunun digəri üçün bir fürsət olduğunu vurğulayan Si, iki ölkənin rəqib deyil, tərəfdaş olmalı və bir-birinin uğuruna və rifahına töhfə verərək böyük güclərin yola davam etməsi üçün düzgün yol tapmalı olduqlarını bildirib.
Si Cinpin iki böyük dövlət arasındakı yaxşı münasibətlərin dünyaya fayda verdiyini qeyd edərək bildirib: “Biz 2026-cı ili tarixi bir dönüş nöqtəsi etməyə, Çin-ABŞ münasibətlərinin nəhəng gəmisinə düzgün istiqamət verməklə münasibətlərdə yeni bir fəsil açmağa hazırıq”.
“Ticarət müharibələrində qalib yoxdur”
Çin və ABŞ arasında iqtisadi və ticarət əlaqələrinin qarşılıqlı faydaya əsaslandığını və hər iki tərəf üçün qazanclı bir münasibət olduğunu vurğulayan Si Cinpin deyib: “Ticarət müharibələrində qalib yoxdur. Əgər fikir ayrılıqları və çəkişmələr varsa, həll üçün yeganə seçim bərabər əsasda məsləhətləşmələrdir”.
Tayvan məsələsinə gəldikdə isə, Si Cinpin Tayvan boğazında sülhün və sabitliyin qorunmasının Çin və ABŞ-ın “ən böyük ortaq nöqtəsi” olduğunu vurğulayıb.
Şayəstə
