Çinin xarici işlər naziri Vanq Yi və Rusiyanın xarici işlər naziri Sergey Lavrov Asiya-Sakit okean regionunda təhlükəsizlik və sabitliklə bağlı vəziyyəti müzakirə ediblər.
Elchi.az xəbər verir ki, Rusiya Xarici İşlər Nazirliyindən verilən məlumata görə, Lavrov və Vanq Malayziyanın paytaxtı Kuala Lumpurda keçirilən Cənub-Şərqi Asiya Ölkələri Assosiasiyasının (ASEAN) Xarici İşlər Nazirləri Toplantısı çərçivəsində görüşüblər.
İkitərəfli münasibətlərin müzakirə olunduğu görüşdə nazirlər Rusiya ilə Çin arasında siyasi dialoq və əməkdaşlığın inkişafından məmnunluq ifadə ediblər.
Görüş zamanı iki ölkə arasında ASEAN, Birləşmiş Millətlər Təşkilatı (BMT), BRİKS, Şanxay Əməkdaşlıq Təşkilatı (ŞƏT), G20 və Asiya Sakit Okean İqtisadi Əməkdaşlıq Təşkilatı (APEC) çərçivəsində əməkdaşlıq müzakirə edilib.
Asiya-Sakit Okean regionundakı vəziyyətin müzakirə edildiyi görüşdə “bəzi ölkələrin bu regionda təhlükəsizlik və sabitlik sistemini zəiflətmək məqsədi daşıyan hərbi siyasi bloklar yaratmağa yönəlmiş addımlar atdığı, Rusiya və Çinin regionun hərbiləşdirilməsinə, NATO-nun hərbi infrastrukturunun regionda yerləşdirilməsinə qarşı çıxdığı” vurğulanıb.
Görüş zamanı həmçinin regional və beynəlxalq problemlərin həlli ilə bağlı fikir mübadiləsi aparılıb.
Nuranə Məmmədova
