“Cənnətin qapılarını döymək” (“Knocking on heavens door”) mahnısı ilə əfsanəyə çevrilən amerikalı yazıçı və musiqiçi Bob Dilan bu gün Ədəbiyyat üzrə Nobel mükafatına layiq görüldü.

Azərbaycanda o qədər də tanınmayan Bob Dilanla bağlı məlumatları təqdim edirik.

Robert Allen Simurden və ya səhnə adı ilə Bob Dilan: 24 may 1941-ci ildə ABŞ-ın Minnesota ştatının Dulut şəhərində anadan olub. Eyni ştatın Hibbinq əyalətində boya-başa çatıb.

Babası Ziqman Simurden və nənəsi Anna Simurden 1905-ci ildə Osmanlı imperiyasının Trabzon şəhərindən Rusiya imperiyasının Odessa şəhərinə köçüb.

Anasının atası Benjamin Eledsteyn və ana nənəsi Libba Edelsteyn Litva əsilli yəhudilərdir. Onlar 1902-ci ildə ABŞ-a köç edib.

Dilan 2004-cü ildə “Xronikles: Volum Van” adlı xatirələrində ata anasının kağızmanlı (Kağızman – Qarsda yer adı) olduğunu, evlənməmişdən əvvəl soyadının “Kirgiz” (qırğız-türk) olduğunu, nənə valideynlərinin nəslinin İstanbuldan gəldiyini yazır.

10 Qremmi mükafatına sahibi olan Dilan hələ 18 yaşında təhsil aldığı universitetdən qovulub.

1971-ci ildə yazdığı “Tarantula”, 1972-ci ildə “Yazılar və rəsmlər”, 1994-cü ildə “Boş kağız”, 2003-cü ildə “Bob Dilanın qəti musiqi kitabı”,  2004-cü ildə “Xronikles: Volum Van”, 2004-cü ildə “1962—2001 mahnı sözləri”, 2005-ci ildə “Bob Dilanin kəsik kitabı – 1956-1966”  kitabları daha çox rokçuluqla şöhrət qazanan Dilanın ədəbiyyat sahəsində də bir o qədər istedadlı olduğunu sübuta yetirdi.

Dilanın “Küləkdə uçuşanlar”, “Zamanlar, onlar dəyişir” mahnıları üçün yazdığı sözlər ABŞ-da insan hüquqları və antimilitarizm hərəkatlarının himninə çevrilib.

Bob Dilan Ədəbiyyat üzrə Nobel mükafatını “Amerikanın musiqi ənənələrində poetik obrazlar yaratdığına görə” alıb.