İriqabaritli və ya ağırçəkili nəqliyyat vasitələrinin icazə verilən qabarit, çəki və yüklə birlikdə oxa düşən kütlə parametrlərinə dair tələblərin pozulmasına görə cəzalar sərtləşdirilir. Avtosfer.az report-a istinadən xəbər verir ki, bununla bağlı İnzibati Xətalar Məcəlləsinə dəyişikliklər edilməsi nəzərdə tutulub. Məcəllənin 163-1.1-ci maddəsinə əsasən, iriqabaritli və ya ağırçəkili nəqliyyat vasitələrinə icazə verilən qabarit parametrlərinə dair tələblərin pozulmasına görə fiziki şəxslər 150 manatdan 200 manatadək, vəzifəli şəxslər 400 manatdan 500 manatadək, hüquqi şəxslər isə 1200 manatdan 1400 manatadək miqdarda cərimə ediləcəklər.
Eyni zamanda, 163-1.2-ci maddayə təklif olunan dəyişikliyə əsasən, iriqabaritli və ya ağırçəkili nəqliyyat vasitələrinin icazə verilən çəki və yüklə birlikdə oxa düşən kütlə parametrlərini aşmaqla ümumi istifadədə olan avtomobil yollarında idarə edilməsinə görə fiziki şəxslər 600 manat miqdarında cərimə edilir. Həmçinin, 163-1.3-cü maddəyə edilməsi nəzərdə tutulan dəyişikliyə görə, iriqabaritli və ya ağırçəkili nəqliyyat vasitələrinin icazə verilən çəki və yüklə birlikdə oxa düşən kütlə parametrlərini aşmaqla yüklənməsinə görə vəzifəli şəxslər 1400 manatdan 1700 manatadək, hüquqi şəxslər 4000 manatdan 5000 manatadək miqdarda cərimə olunacaqlar.
Məcəllənin 163-1.1-ci maddəsində nəzərdə tutulan xətanın il ərzində inzibati tənbeh alan şəxs tərəfindən təkrar törədilməsinə görə, fiziki şəxslər 300 manatdan 400 manatadək, vəzifəli şəxslər 600 manatdan 800 manatadək, hüquqi şəxslər isə 1500 manatdan 2500 manatadək miqdarda cərimə ediləcək.
163-1.2 maddədə nəzərdə tutulan xətanın il ərzində inzibati tənbeh alan şəxs tərəfindən təkrar törədilməsinə görə, nəqliyyat vasitələrini idarə etmə hüququ altı aydan bir ilədək müddətə məhdudlaşdırmaqla 1200 manat miqdarda cərimə ediləcək.
163-1.3 maddədə nəzərdə tutulan xətanın il ərzində inzibati tənbeh alan şəxs tərəfindən təkrar törədilməsinə görə vəzifəli şəxslər 2000 manatdan 2500 manatadək, hüquqi şəxslər 6000 manatdan 8000 manatadək miqdarda cərimə ediləcəklər.
Qeyd edək ki, İnzibati Xətalar Məcəlləsinə təklif edilən dəyişikliklər Milli Məclisin fevralın 1-də keçiriləcək iclasında müzakirə olunacaq.
Son şərhlər