Britaniya hökuməti Belarusa qarşı bir sıra məhsulların idxal və ixracını məhdudlaşdıran yeni sanksiyalar paketini təqdim edib.
Elchi.az Armenpress.am-a istinadən xəbər verir ki, bu barədə Krallığın Xarici İşlər Nazirliyinin yaydığı məlumatda deyilir.
“Yeni sanksiyalar paketi Rusiyanın Ukraynanın ərazi bütövlüyünə məhəl qoymadan həyata keçirdiyi hərbi əməliyyatlara fəal dəstək verən Lukaşenko və onun rejiminə iqtisadi təzyiqi artırır.
Biz Ukraynaya nə qədər lazımdırsa, onu güclü şəkildə dəstəkləməyə davam edəcəyik. Böyük Britaniya Putinə müharibə aparmağa kömək edənlərə qarşı yeni tədbirlər görməkdən çəkinməyəcək”, – deyə departamentin rəhbəri Ceyms Kleverli bildirib.
“Tətbiq olunan sanksiyalara Belarusdan qızıl, taxta, rezin və sement idxalına qadağa da daxildir. Kimyəvi və bioloji silahların yaradılmasında istifadə oluna bilən sənaye avadanlıqlarının, əskinasların və malların Belarusa tədarükünə də məhdudiyyətlər qoyulur. Məhdudiyyətlər onunla izah olunur ki, Belarus rəhbərliyi guya Rusiyaya öz quru və hava məkanından istifadə edərək Ukrayna ərazisinə raket və dronların köməyi ilə hücuma keçməyə icazə verib, həmçinin Rusiya qoşunlarına maddi-texniki dəstək göstərib.
Böyük Britaniya Xarici İşlər Nazirliyi həmçinin sanksiyaya məruz qalmış Belarus KİV-lərinin Böyük Britaniyada təbliğat aparmasına imkan verməyəcəyinə söz verib. Bu o deməkdir ki, sosial şəbəkələr və internet xidmət provayderləri sanksiyaya məruz qalmış Rusiya təşkilatlarında olduğu kimi, sanksiyaya məruz qalmış Belarus KİV-lərinin saytlarına girişi məhdudlaşdıracaqlar”, – hesabatda deyilir.
Yeganə
Son şərhlər