İlk baxışda dəhşətli görünsə də müasir Azərbaycan reallığında təəccüblü qarşılanmayacaq bir əcaib olayla bağlı şikayət məktubu daxil olub.

Bərdə rayon Əliyanlı  kənd sakini Səfquliyev Aslan Məhiş oğlu məktubunda bildirir ki, tanışı, rayonun Otuzikilər kənd sakini Vəliyev Mübariz Əhəd oğlu etibardan sui-istifadə edərək ondan aldığı 1200 manat borcu qaytarmaqdan müxtəlif bəhanələrlə imtina etdikdən sonra məhkəməyə müraciət etmək zorunda qalıb.

Əsl həngamə də bundan sonra başlayıb. Belə ki, iki məhkəmə prosesinə üzrsüz səbəbdən gəlməyən cavabdehin yaşadığı ünvana bildiriş göndərilib. Bu zaman bəlli olub ki, cavabdeh dünyadan köçüb. İddiaçının israrlı tələbi ilə cavabdehin qeydiyyatda olduğu kəndin icra nümayəndəsindən rəsmi sənəd tələb edilib və bu zaman hamını şoka salan fakt üzə çıxıb. Hətta cavabdehin ölüm haqqında şəhadətnaməsi də məhkəməyə təqdim olunub. Baş verənlərlə heç cür razılaşa bilməyən iddiaçı cavabdehin həyatda olduğunu, sadəcə ona və daha bir neçə nəfərə olan borcunu ödəməmək üçün qaçıb gizləndiyini iddia edərək Bərdə rayon prokurorluğuna müraciət edib. Prokurorluqda ona bildiriblər ki, onun iddiasına rayon məhkəməsində baxıldığından məsələyə müdaxilə etmək səlahiyyətləri yoxdur. Bundan sonra əli hər yerdən üzülən iddiaçı Moderator.az vasitəsiılə başına gələnlərin ictimailəşməsini xahiş etmək zorunda qalıb. Aslan Səfquliyev indi bilmir taksi fəaliyyəti ilə qazandığı halalca pulunu tələb edə, yoxsa ondan aldığı pulu qaytarmayan şəxsin həyatda olduğunu müvafiq qurumlara sübut edə.

Moderator.az da öz növbəsində hörmətli baş prokuror Zakir Qaralova müraciət edərək məsələni şəxsi nəzarətinə götürməsini xahiş edir. Əgər gerçəkdən də iddialar təsdiqlənsə cavabdehin borcu ödəməkdən imtina etmək üçün əl atdığı bu fırıldağa görə qanun qarşısında cavab verməsinin təmin edilməsi, eyni zamanda saxta ölüm şəhadətnaməsi verən şəxslərin də ifşa edilməsi üçün tədbirlər görülməsi ədalətin təntənəsi olardı. Biz hörmətli baş prokurordan təxirəsalınmaz tədbirlər görülməsini bir daha xahiş edirik.