“Bir çox hallarda tenderlərdə iştirak edən şirkətlərə təzyiq edirlər ki, geri çəkilsin” – Qüdrət Həsənquliyev

“Biz bayramlar ərəfəsindəyik. Hörmətli sədr, həm sizi, həm Ali Baş Komandanı Ordu Günü və Qurban Bayramı münasibətilə təbrik edirəm. İnşallah tezliklə Xankəndidə dövlət bayrağının asılacağı günü gözləyirik. Məndən öncə çıxış edən həmkarlarımın fikirlərini diqqətlə dinlədim. Orada qaldırılan bir çox məsələləri bölüşürəm. Yeni qanunla biz, ona nail olmağa çalışmalıyıq ki, bu sahədə şəffaflıq artırılsın, dövlət vəsaitləri səmərəli istifadə olunsun”.
Bu fikirləri Bütöv Azərbaycan Xalq Cəbhəsi Partiyasının (BAXCP) sədri, parlamentin hüquq siyasəti və dövlət quruculuğu komitəsinin sədr müavini Qüdrət Həsənquliyev Milli Məclisin növbədənkənar sessiyasının bu gün keçirilən iclasında “Dövlət satınalmaları haqqında” qanun layihəsinin birinci oxunuşda müzakirəsi zamanı deyib. Millət vəkili “təcrübədə biz nələri müşahidə edirik? Mən istəyirəm indi biz, qanunla tanış olan insanlar görsünlər ki, bu qanun rastlaşdığımız nöqsanları aradan qaldıra biləcək, yoxsa yox?”, – deyə vurğulayıb: “Təcrübədə onu görürük ki, bir çox hallarda tenderlərdə iştirak edən şirkətlərə təzyiq edirlər ki, geri çəkilsin. Düşünürəm ki, bunu hər kəs bilir, bu barədə məlumatlar var. Məndən öncə də başqa problemlər barədə danışıldı. Bundan başqa da məktublar, təklifər göndərilir. Və o təkliflər çox təəssüf ki, müvafiq komissiya tərəfindən açılır və hansısa şirkətə deyilir ki, tutaq ki, ən axırıncı qiyməti filankəs 50 manat yazıb, sən 49 manat yaz. Beləliklə də orada kimin üçünsə orada üstün hüquqlar təmin edilir və həmin şəxs, həmin şirkət qalib elan olunur. Ona görə də mən təklif edirəm, qanunda biz, elə mexanizmlər nəzərdə tutaq ki, tenderə kimin qatılacağını həmin komissiya əvvəldən bilməsin ki, ona təsir edə bilməsinlər. Tutaq ki, nə alınacaqsa onların siyahısı dərc olunur və elan olunur ki, komissya müəyyən tarixdə müəyyən yerdə toplanır. Kim qatılmaq istəyirsə gəlsin, həmin gün lap yarım saat qabaq lazım olan ödənişləri də etsin və tenderə qatılsın. İkincisi, həmin şəxs gəlir və təkliflərini də orada elan edir. Bu da onlayn qaydada translasiya olunur, videoqeydiyyat aparılır. Ona görə ki, nəticələrdən narazı qalan vətəndaş məhkəməyə müraciət edə və məhkəmədə sübut edə bilsin ki, mən öz layihəmi təqdim etdim, filankəs də təqdim etdi, indi onun və mənim təkliflərimə qulaq asın. Görün necə oldu ki, tutaq ki, mən yox, filankəs qalib gəldi. Əgər biz, bu mexanizmi yaradacağıqsa, hesab edirirəm ki, burada şəffaflığı təmin edə biləcəyik. Yox əgər, qeyd elədiyim məsələlər qanunda öz əksini tapmayacaqsa yenə də köhnə qaydada, öncədən razılaşma olmadan bir şirkətin tenderi udması müşkül məsələ olaraq qalacaq”.