“Qarabağ”dan ayrılaraq böyük ümidlərlə Türkiyə superliqa təmsilçisi “Eskişehirspor”a transfer olunan Muarem Muarem meydanda görünmür.
Qol.Az-ın müxbiri makedoniyalı yarımmüdafiəçi ilə əlaqə saxlayaraq bunun səbəbini öyrənib.
– Muarem, səni niyə meydanda görmürük?
– Düzdür, meydana çıxmıram. Cəmi iki qarşılaşmada 35 dəqiqə oynamışam. Bir müddət zədədən əziyyət çəkdim. Yenicə sağalmışam. Bir həftədir ki, məşq edirəm. Ayaq əzələmdə yırtıq var idi. İstanbulda müailicə olundum.
– Oynamamağının səbəbi yalnız zədədirmi?
– Yox, zədədən əvvəl də baş məşqçi mənə şans vermirdi. Məşqçilərimizin istəyi ilə bura gəlmişəm. Amma gəldikdən sonra hər şey dəyişdi. Təlim-məşq toplanışı zamanı bütün yoxlama matçlarında oynadım. Ancaq superliqa oyunlarında ehtiyatda qaldım. Hər halda belə davam edərsə, burda qalmayacam.
– Nə qədər gözləmək fikrin var?
– Dekabra qədər. Görək, ilin sonuna qədər necə olacaq. Bura oynamaq üçün gəlmişəm, ehtiyatda qalmağa yox.
– “Qarabağ”a qayıtmaq istərdin?
– “Qarabağ” mənim üçün özəl bir komandadır. Karyeramı “Qarabağ”da bitirmək istəyirəm. Hər zaman söyləmişəm ki, harda oluramsa olum həmişə “Qarabağ”da oynamaq istərəm.
– Sabiq komanda yoldaşlarınla əlaqən var?
– Əlbəttə, müntəzəm olaraq danışıram. Heç vaxt orda yaşadıqlarımı unutmaram.
– Kimlərlə danışırsan?
– Şehiç, İlqar, Dmitroviski və Rəşad abiylə internet vasitəsilə əlaqə saxlayıram.
– “Eskişehirspor”a daha çox pul qazanmaq üçün getdin? Mətbuatda belə yazılırdı.
– Ola bilər. Hər kəsin bir düşüncəsi var. Ancaq bura niyə gəldiyimi bir Allah bilir.
– Bəs niyə avrokuboklarda çıxış edən komandanı “Eskişehirspor”a dəyişdin?
– Sırf karyeramı düşünürək bura gəldim. Belə bir təklif olduğunu əvvəlcədən Qurban Qurbanova da demişdim. Bildirmişdim ki, superliqada özümü sınamaq istəyirəm. Bəli, Türkiyə futbolunda pul daha çoxdur. Ancaq sabit olaraq maaş almaq olmur deyə superliqaya gələndə düşünməli olursan. Mən sadəcə, özümü sınamaq üçün Türkiyəyə gəldi.
– “Qarabağ”dan ayrılan digər futbolçu Leroy Corc da Türkiyədə oynayır. Onunla əlaqə saxlayırsan?
– Hərdən danışırıq. Onların durumu yaxşıdır. Yəqin ki, bu mövsüm superliqaya vəsiqə qazanacaqlar.
– “Qarabağ” oktyabrın 22-də Avropa Liqasının qrup mərhələsində “Monako”nun qonağı olacaq. Sabiq komandandan nə gözləyirsən?
– “Qarabağ”ın hər matçını izləyirəm. Çətin oyun olacaq. Amma “Qarabağ” çox yaxşı komandadır, güclü baş məşqçisi var. Yəqin ki, onlara qarşı necə oynayacaqlarını bilirlər. Mən çox ümidliyəm ki, səfərdən uduzmadan qayıdacaqlar. Məncə, “Qarabağ” Monakoda xal və ya xallar qazanacaq. Mən bu komandada oynamışam. Bilirəm ki, “Qarabağ” heç vaxt səfərə uduzmaq üçün getmir.
Son şərhlər