Azərbaycanda uşaqdan böyüyə hamının Putinin dostu kimi tanıdığı İlham Rəhimovun “Yeni Müsavat” qəzetinə müsahibə verərək ad çəkməsə də BAXCP sədri, millət vəkili Qüdrət Həsənquliyevi aşağılayan ifadələr işlətməsi gündəmə damğasını vurdu və onun bu cür təhqiramiz ritorikasına cavab özünü çox gözlətmədi.

Belə ki, Q. Həsənquliyev APA İnformasiya Agentliyinə və ardından Moderator.az saytına müsahibə verərək obrazlı desək İlham Rəhimovu quru yuyub yaş sərdi.

Demək olar ki, fikirlərin əksəriyyəti üst-üstə düşdüyündən biz  APA-da gedən müsahibəni də saytımızda yerləşdirdirərək orada qeyd olunan bir çox məqamları təkrar oxuculara təqdim etməyi artıq hesab etdik. Eyni zamanda müsahibədəki sərt ritorikanı da mülayimləşdirərək oxuculara təqdim etmək qərarına gəldik:

– Bilirsiniz, 2013-cü ilin prezident seçkiləri ərəfəsində İlham Rəhimovla bağlı jurnalistlər mənə sual vermişdilər, mən də onda demişdim ki, İlham Rəhimov siyasətlə məşğul olmadığı haqqında bəyanat verib. Eyni zamanda demişdim ki, İlham Rəhimovun Putinin dostu olması heç də o demək deyil ki, o prezident olmalıdır. Yəni prezidentliyə namizəd olmaq üçün gərək ən azı aktiv şəkildə ictimai-siyasi həyatda olasan, öz platforma və proqramını ortaya qoyasan, xalqa açıq şəkildə deyəsən ki, sən prezident olsan nələri və necə edəcəsən. Həmin vaxt əslində mən onun şəxsiyyətinə toxunan, onu aşağılayan hər hansı ifadə işlətməmişdim. Sadəcə demişdim ki, bu adam özü siyasətdə yoxam deyirsə bunu qəbul etmək lazımdır. Amma o vaxt o məni təhqir elədi və “mən bilirəm o Azərbaycan parlamentinə necə seçilib”, “çox təəssüf ki, parlamentə belə adamları da seçirlər” kimi ünvanıma çox aşağılayıcı ifadələr işlətməklə bərabər həm də parlamentin necə formalaşmasına ironik yanaşma sərgiləmişdi. Bununla da o hansısa siyasi proseslərdə rol almış olduğunu ortaya qoymuş olmuşdu. Xatırlayırsınızsa həmin vaxt İlham Rəhimova Ali Attestasiya Komissiyasında iş verilmişdi və işə qəbul olunandan 9 gün sonra onu tutduğu vəzifədən azad etdilər. Sonradan o səhv etdiyini bu iqtidara çatdırdı və bağışlanmasını dilədi. Ona qarşı da böyüklük nümayiş etdirildi və onu bağışladılar, yenidən işinə qaytarıldı. Amma görünür bu adamın tərbiyəsi və xarakteri elədir ki, heç cür dəyişə bilmir.

Bu məsələdə ara sakitləşəndən sonra mən də onun cavabını qaytarmadım və düşündüm ki, bir insident oldu və başa çatdı. Bundan sonra son illər ərzində bir dəfə də olsun onun barəsində nə mətbuatda, nə parlamentdə, nə də hətta ikitərəfli söhbətlərdə heç vaxt nəinki onu aşağılayan ifadələr işlətmək, hətta adını da dilimə gətirmədim. Amma mən bu günlərdə “Yeni Müsavat” qəzetinə verdiyim müsahibədə söyləmişəm ki, Rusiyanın regionda maraqları var, regionda bir daha qanlı savaş olmasın deyə, sülh yolu ilə münaqişəni Azərbaycanın maraqları çərçivəsində həll etmək üçün Rusiya ilə açıq danışıqlar aparmalıyıq. Demişdim ki, bu münaqişənin arxasında Rusiya dayandığını bütün dünya bilir və Ermənistan məhz Moskvanın himayəsinə güvənərək sülh prosesini uzatmaq üçün min oyundan çıxır. Bildirmişdim ki, danışıqları Ermənistanla deyil, Rusiya ilə aparmalıyıq və Qarabağın, eyni zamanda ətraf 7 rayonun işğaldan azad edilməsi müqabilində Rusiyanın maraqlarını Azərbaycanın suverenliyinə toxunmadan təmin edək. Təkliflər də vermişəm ki, bundan sonra biz Kollektiv Təhlükəsizlik Müqaviləsi Təşkilatına da, Gömrük İttifaqına da, Avrasiya Birliyinə də üzvlük məsələsinə baxa bilərik. Hətta Qəbələ RLS kimi bir hərbi bazanın yaradılmasına da icazə vermək olar. Bildirmişdim ki, biz hətta Azərbaycanın neft-qaz ixracı siyasətini də Moskva ilə uzlaşdıra bilərik ki, Rusiyanın maraqlarına toxunmasın, təki bu qanlı-qadalı savaş bu dəfə sülh yolu ilə həllini tapsın.

Amma bu adam müsahibədə jurnalistin verdiyi çoxsaylı suallara cavab verməkdən yayınaraq Rusiyanın Azərbaycanda hərbi baza yarada bilməsi məsələsindən yapışıb birbaşa təhqirə keçir, məni qeyri-yetkinlikdə, uzaqgörən olmamaqda ittiham etməklə kifayətlənmir, bunu alverçi yanaşması, mənəvi nöqteyi-nəzərdən qəbuledilməz adlandırır. Bu adamın son 10 ildəki tərcümeyi-halını Azərbaycanda hər kəs bilir. Belə bir bioqrafiyası olan adam gərək mənəviyyət sözünü ümumiyyətlə dilinə gətirməsin. Onun müəyyən bir səviyyəyə gəlib çatmasında böyük xidmətləri olmuş İsmayılovlar ailəsinin (Ədalət Partiyasının sədri, keçmiş millət vəkili İlyas İsmayılov və onun Rusiyada bir neçə il həbs yatmış oğlu Etimad İsmayılov nəzərdə tutulur-red.) onun haqqında dediklərinə, yazdıqlarına baxmaq kifayətdir. Yaxud götürək bunun mənim haqqımda dediyi qeyri-yetkinlik və alverçi ittihamlarına. Bu adam hələ də anlaya bilmir ki, insanları maraqlar birləşdirdiyi kimi dövlətləri də maraqlar yaxınlaşdırır və ya düşmən edir. Rusiyanın da Azərbaycandakı marağı göz önündədir və mən də təklif etmişəm ki, gəlin Azərbaycanın suverenliyi və ərazilərimizin işğaldan bütünlüklə azad olunması naminə bu maraqları mümkündürsə təmin edək. Azərbaycanda uşaqdan böyüyə hamı bilir ki, biz bu illər ərzində Qarabağ problemini məhz Ermənistanın arxasında Rusiyanın dayandığına görə həll edə bilmirik. İndi təsəvür edin ki, Rusiyadakı rejimə sığınıb alverlə məşğul olan bir adam bizə vətənpərvərlik dərsi keçir. Halbuki 1 milyon qaçqının bu illər ərzində zillət içərisində yaşaması, olmazın məşəqqətlərini çəkməsi, yeraltı qazmalarda, vaqonlarda, qamışdan-palçıqdan tikilmiş daxmalarda can verməsi onun vecinə də deyil. Hələ dövlətimiz bu istiqamətdə milyardlarla vəsait xərcləsə də bu köçkünlər ordusunun əksəriyyətini evlə təmin edə bilməyib. Azərbaycana, onun xalqına belə müsibətlər yaşatmış bir rejimin himayəsinə sığınıb alver edən bir adamın başqasını alverçilikdə ittiham etməsi sözlə ifadə edilməyəcək qəbahətdir. 

Özü də bu adamın indi fəallaşması heç də təsadüfi deyil. 2013-cü ilin prezident seçkilərindən öncə Rüstəm İbrahimbəyov Azərbaycana göndərildi, o gəlib burada “Ziyalılar Birliyi” adı altında bir qurum formalaşdırmağa başladı. Niyyət də bəlli idi, Moskvanın diqtəsi ilə Azərbaycanda sabitliyi pozaraq özlərinin oyuncaq namizədini gətirib  prezident etmək istəyirdilər. Amma Azərbaycan hakimiyyətinin çox qətiyyətli addımları, ortaya cəsarətli mövqe qoymaları sayəsində bu məkrli layihə iflasa uğradı. Növbəti prezident seçkilərinə də 2 il qalır. Düşünürəm ki, bu dəfə daha həssas bir mövzu üzərində – Qarabağ kartı ilə yeni siyasi oyunbazlığa start verilib. Siz jurnalistlər son vaxtlar İlham Rəhimovun açıqlamalarını götürüb təhlil edin görün o cəmiyyətə hansı mesajları verir. Kifayət qədər primitiv düşüncə tərzinə malik olan bu adam elə zənn edir ki, Azərbaycan insanı bunun qəlbindən keçən niyyətlərin, siyasi iddiaların nədən ibarət olduğunu anlamır və günlərin bir günü bir xilaskar kimi bunu qəbul edə bilər.

Baxın görün bu adam nələr danışır?

2 aprel döyüşlərindən sonra bəyanat verir ki, fürsət düşmüşkən istərdim ki, biz Xankəndini də tutaq. Arxasınca da bəyanat verir ki, gördünüz də, mən dəfələrlə deyirdim ki, Rusiya bu münaqişəyə qatışmayacaq, gördünüz ki, qatışmadı. Necə qatışmadı? 3 gündən sonra Moskva dedi ki, gəlin atəşkəs imzalayın, hər iki ölkənin baş qərargah rəislərini Moskvaya çağırdılar və bu zaman Azərbaycanın sadəcə olaraq həmin sazişi imzalamaması bizim üçün çox ciddi problemlər yarada bilərdi.

Bu adam Qərbi də özünə tərəf çəkmək üçün primitiv olduğu qədər də anti-Azərbaycan mövqe sərgiləməkdən çəkinmir. Jurnalist buna sual verir ki, niyə Qərb Qarabağ məsələsində Azərbaycana dəstək vermir? Görün bu adam nə mesajlar verir? Deyir ki, Qərb ona görə bizi dəstəkləmir ki, Avropanın ali dəyərləri Azərbaycan tərəfindən dəstəklənmir. Bilirsiniz, bu sözləri demək üçün insanda doğrudan da azacıq da olsa abır-həya olmalıdır. Krımı, başqa bir dövlətin beynəlxalq hüquqla tanınmış sərhədləri içərisində olan bir ərazini Rusiya həyasızcasına işğal elədi, amma İlham Rəhimov çəkinmədən Rusiyanın bu işğalçılıq siyasətini müdafiə etdi. Ukrayna elə bu adamın iddia etdiyi ali Avropa dəyərlərini mənimsəmək istəmirdimi? Elə buna görə Moskva Ukraynanı cəzalandırmadımı? Sən Ukraynanın müdafiəsinə qalxdınmı? Amma indi görün nə baş verir? Bu adam Qərbə reverans edir ki, onların da dəstəyini qazansın, çünki bilir ki, Azərbaycanda hakimiyyətə gəlmək üçün Qərbin də dəstəyi lazımdır.