Virtualaz.org saytı xəbər verir ki, Rusiya Kommunist Partiyasının lideri Gennadi Züqanovun Bakıya səfərindən sonraya təsadüf edən bu qurultayda partiyanın 28 rayon təşkilatının nümayəndələri iştirak ediblər.

Partiyadan yayılan press-relizə əsasən qurultayda Mərkəzi Komitənin və nəzarət-təftiş komissiyasının hesabatları dinlənilib, mərkəzi orqanlara seçkilər olub. Söhbət “züqanovçu kommunistlərdən” gedir.

Partiyanın 31 nəfərdən ibarət Mərkəzi Komitəsinin sədri vəzifəsinə Gülnisə Məhsimova seçilib, nəzarət-təftiş komissiyasının sədri isə Ədalət Yaqubov olub.

Qurultayda Azərbaycanda mürəkkəb sosial-iqtisadi vəziyyətdən danışılıb, kommunistlərin sosial ədaləti müdafiə etməli olduğu vurğulanıb. Həmçinin çoxqütblü dünyanın vacibliyi, Azərbaycanın Rusiya ilə yaxınlaşmasının zəruriliyi vurğulanıb. Bununla əlaqədar olaraq Azərbaycan prezidenti İlham Əliyevin xarici siyasət kursuna dəstək ifadə olunub.

Kommunist-züqanovçuların qurultayında partiyanın keçmiş sədri Rauf Qurbanov və onun tərəfdarları üzvlükdən xaric edilib. Onlar bölücülük fəaliyyətində və partiyanı parçalamaqda ittiham olunublar. Bildirilib ki, Qurbanov və tərəfdarları bir neçə ildir özlərini “Azərbaycanın Kommunist Partiyası” kimi təqdim edərək KİV-lərə yalan məlumatlar ötürüblər.

Xatırladaq ki, kommunistlərin qurbanovçular qanadı ötən ilin oktyabrında plenum keçirmişdilər. Bu plenumda ilk partiya təşkilatının qərarı əsasında partiyanı parçalamaq səylərində, yoldaşlar arasında düşmənçilik salmaqda və kommunistə yaraşmayan təxribatçı hərkətlərə yol verməkdə günahlandırılan Məhsimova Gülnisə Əlisoltan qızı Azərbaycan Kommunist Partiyası sıralarından qovulub.

Plenumda həmçinin partiyanın Mərkəzi Komitəsinin sədri Rauf Qurbanov məruzə ilə çıxış edib. O, kommunistlərin əsas fəaliyyət istiqamətləri haqda danışıb, yoldaşlar arasında dostluq münasibətlərinin inkişafının vacibliyini bildirib.