Bakı beynəlxalq tədbirlərin keçirildiyi siyasi fikir mərkəzinə çevrilir.

Bu barədə Bakıda keçiriləcək IV Qlobal Bakı Forumunun əhəmiyyəti barədə Axar.az-a danışarkən sabiq dövlət müşaviri Qabil Hüseynli deyib. Politoloqun sözlərinə görə, IV Qlobal Bakı Forumu Azərbaycanın artıq beynəlxalq xarakterli məsələlərə ev sahibliyi etməsindən xəbər verir:

“Forumda çox ciddi məsələlər, xüsusilə də təkqütblü və çoxqütblü dünyanın formalaşdırılmasının mümkün nəticələri müzakirə ediləcək. Bu tədbir Bakını dünyanın dörd paytaxtından birinə çevirəcək. Dünyanın bir çox tanınmış siyasətçiləri Bakıya axın edəcək və Forumda bir nömrəli qlobal problemlərin müzakirəsi gündəmdə olacaq. Diqqəti ən çox çəkən mövzu isə çoxqütblü dünyanın formalaşdırılması ilə bağlıdır. Bunun müsbət və mənfi tərəfləri var. Çox dərinliyə varmadan onu qeyd etmək olar ki, Bakıda keçirilən tədbirlər sırf elmi və müzakirə xarakteri daşıyır. Forumda səsləndiriləcək fikirlər qərar xarakterli deyil, daha çox tövsiyə əhəmiyyətlidir. Postsovet məkanındakı münaqişələrin həlli mühüm əhəmiyyətə malikdir. Hazırda dünyada mövcud bir sıra xalqların taleyi və bir çox ölkələrin iqtisadi inkişafı bu dondurulmuş münaqişələrin həllindən asılıdır. Buna görə də bu forumda Qarabağ məsələsinin müzakirəsi böyük əhəmiyyətə malikdir”.

Politoloq hesab edir ki, IV Qlobal Bakı Forumu həm də sivilizasiyalararası dialoqun bir nümunəsidir:

“Hazırda dünya siyasi sistemi böhran yaşayır. Sivilizasiyaların toqquşması məsələsi gündəliyə gəlib. Yaxın Şərq və digər ölkələrdə baş verən hadisələrdə islam dinini terrorla eyniləşdirmək və islamafobiyanın bir baxış kimi Avropa ölkələrində yaymaq cəhdləri var. Əvvəlkilərdən fərqli olaraq bu forum daha geniş mövzuları əhatə edəcək, burada çox tutumlu və ətraflı müzakirələr aparılacaq. Bir sözlə, IV Qlobal Bakı Forumunda daha ciddi əqli nəticələrin şahidi olacağıq”.

Qeyd edək ki, sabah Bakıda Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə IV Qlobal Bakı Forumu keçiriləcək. Forumda Albaniya, Monteneqro, Bolqarıstan, Makedoniya, Bosniya və Herseqovina və Gürcüstan Prezidentləri iştirak edəcək. Bundan başqa, 27 sabiq prezident və 23 sabiq baş nazir də daxil olmaqla 53 ölkədən 300-dən çox nümayəndənin iştirakı gözlənilir.